Хәбиров 2026 йылда яҙғы баҫыу эштәре буйынса Бөтә Рәсәй кәңәшмәһендә ҡатнашты

– Рәсәй Федерацияһында яҙғы сәсеү кампанияһы старт ала. 2026 йылда сәсеү майҙаны план буйынса 83 миллион гектар булырға тейеш. Шул иҫәптән ужым культуралары өсөн былтыр 20 миллион гектар самаһы сәселгән. Һуңғы мониторинг һөҙөмтәләре сәсеүлектәрҙең 97 проценты нормаль хәлдә булыуын раҫланы. Был биш йыл эсендәге уртаса күрһәткестәрҙән юғарыраҡ, – тине Дмитрий Патрушев. – Яҙғы культуралар өсөн майҙан яҡынса 56 миллион гектар тәшкил итәсәк. Шул иҫәптән иген сәсеүлектәре 700 мең гектарға тиерлек арта. Шулай уҡ майлы культураларға ҡаралған майҙан 300 мең гектарға күберәк булырға тейеш.

Төбәктәргә сәсеү майҙандарының раҫланған структураһын үтәүҙе тәьмин итеү мөһим, тип һыҙыҡ өҫтөнә алды вице-премьер. Эске аҙыҡ-түлек баҙарында ихтыяж һәм тәҡдим балансы башлыса ошо күрһәткес менән бәйле.

Дмитрий Патрушев шулай уҡ, Рәсәй Федерацияһы субъекттарының яртыһы тиерлек аграрийҙары баҫыуҙарға сыҡты, тип хәбәр итте. Яҙғы сәсеү 2,7 миллион гектар майҙанда үткәрелгән. Өҫтәмә туҡландырыу 12 миллион гектарҙан ашыу ужым культураларына ҡағылған. Был культураларҙың торошон вице-премьер айырым контролдә тоторға ҡушты.

– Эш темптарын түбәнәйтмәү мөһим. Ә аграрийҙар кәрәкле ресурстар менән тулыһынса тәьмин ителгән. Ошо маҡсатта Хөкүмәт тарафынан ярҙам һәм көйләү саралары ҡаралған. Улар тәү сиратта минераль ашламаларҙы һаҡлауға ҡағыла. Эске баҙарҙа был продукцияға хаҡтар тотороҡло ҡала, – тип һыҙыҡ өҫтөнә алды Рәсәй Хөкүмәте Рәйесе урынбаҫары. – Ашламалар һатып алыу динамикаһы ыңғай. Уларҙы һатып алыу планы май аҙағына тиклем иҫәпләнгән һәм 90 процентҡа тиерлек үтәлгән.

Миҙгелле баҫыу эштәрен яғыулыҡ менән тәьмин итеү өсөн илдең Ауыл хужалығы министрлығы һәм Энергетика министрлығы тәҡдим ителгән яғыулыҡ-майлау материалдары күләмен килештерҙе. Дмитрий Патрушев был осорҙа аграрийҙар өсөн яғыулыҡтың асыҡлығын айырыуса контролдә тоторға ҡушты.

Радий Хәбиров үҙ сығышында Башҡортостанда яҙғы баҫыу эштәре башланыуын һыҙыҡ өҫтөнә алды.

– Хужалыҡтар дымды ҡаплау, шулай уҡ ужым культураларын һәм күп йыллыҡ үләндәрҙе туҡландырыу, тырмалау буйынса эш алып бара. Һауа торошо яҡшы торған осраҡта, сәсеүгә 20 апрелдә тотонорға ниәтләйбеҙ, – тип билдәләне төбәк етәксеһе. – Быйыл сәсеү майҙаны былтырғы кимәлдә һаҡланасаҡ. Яҙғы сәсеүҙе – 2 миллион гектарҙан ашыу, ужым культураларын 300 мең гектарға яҡын майҙанда үткәрергә планлаштырабыҙ. Майлы культуралар аҫтындағы майҙанды арттырыу мөһим. Республика хужалыҡтары иген, ҡуҙаҡлы иген культуралары һәм көнбағыш орлоҡтары менән тулыһынса тәьмин ителгән. Иген һәм көнбағыш буйынса Рәсәй орлоҡтары өлөшө – 82 процент. Автопарктың техник әҙерлеге юғары. Мәҫәлән, тупраҡты 12 мең трактор әҙерләйәсәк, ә сәсеүлектәрҙә 5 меңдән ашыу берәмек ауыл хужалығы техникаһы эшләйәсәк.

Башҡортостан Башлығы ил Хөкүмәтенә республика аграрийҙарына финанс ярҙамы өсөн рәхмәт белдерҙе.

– Быйылғы яҙғы баҫыу эштәренә Рәсәйҙең Ауыл хужалығы министрлығы тарафынан 17 миллиард һум самаһы льготалы ҡыҫҡа сроклы кредиттар хуплау тапты, был хужалыҡтарҙың ихтыяждарына тулыһынса тап килә. Шулай уҡ ике кимәлдәге бюджеттан 1,4 миллиард һумдан ашыу дәүләт ярҙамы йүнәлтергә планлаштырабыҙ, – тине Радий Хәбиров. – «Агросәнәғәт комплексында кадрҙар» федераль проекты сиктәрендә күрһәткән ярҙамығыҙ өсөн айырым рәхмәт белдерәм. 2025 йылда бүленгән 1 миллиард һумға Башҡорт дәүләт аграр университетының икенсе уҡыу корпусына капиталь ремонт яһалды.

Радий Хәбиров шулай уҡ профилле юғары уҡыу йорто базаһында «Агропрофессионалитет» программаһы сиктәрендә уҡыу-производство үҙәген булдырыу инициативаһы менән сығыш яһаны. Бында яңы машина-технология компанияларын кадрҙар менән тәьмин итеү һәм йыл һайын заманса техникала, шул иҫәптән пилотһыҙ авиация системаларында эшләү өсөн 500-гә яҡын белгес әҙерләү планлаштырыла. Дмитрий Патрушев илдең Ауыл хужалығы министрлығына был тәҡдимде ҡарарға ҡушты.

Башҡортостандың Рәсәйҙең машина-технологик компанияһын эшләтеп ебәргән тәүге төбәк булыуын билдәләп үтергә кәрәк: Республиканың төп партнёры «Росагролизинг» компанияһы заманса ауыл хужалығы машиналары техникаһының тәүге партияһын оҙата башланы ла инде. Йәйгә уларҙың һаны 250-гә тиклем арта, тип күҙаллана.