Башҡортостан Башлығына мөрәжәғәттән һуң видеокамералар ҡуйылды

2023 йылда тура бәйләнеш ваҡытында Бөрйән районынан Рәзинә Кәләева:

-Беҙ урман зонаһында йәшәйбеҙ һәм районда тәбиғәт янғындары менән хәл ҡатмарлы. Белеүебеҙсә, әлеге ваҡытта янғындарҙы асыҡлау өсөн видеокүҙәтеү камералары ҡуйыла башланы. Уны беҙҙең районда ла урынлаштыу мөмкин буласаҡмы? - тип ҡыҙыҡһынды.

Әле Бөрйән районының Байназар, Иҫке Собханғол ауылдарындағы һәм Ырғыҙлы ауылындағы Башҡортостан Милли паркы вышкаһында 3 урман янғындарын күҙәтеү системаһы - видеокамералар ҡуйылған.

-Урман фонды участкаларына йүнәлтелгән видеокүҙәтеү камералары төтөнгә оҡшаш һүрәттәрҙе теркәй. Камераларҙың булыуы, әлбиттә, уңайлы. Бигерәк тә янғын хәүефе артҡан миҙгелдәрҙә камералар ҙур ярҙамсы. Уларҙан тыш сүп-сар урындарында фотоҡапҡандар ҡуйылған, сөнки, тап шул ерҙәрҙә янғындар йыш сыға. Урман янғындарын асыҡлау буйынса мониторинг райондағы Берҙәм дежур-диспетчер хеҙмәте диспетчерҙары һәм урман хужалығы хеҙмәткәрҙәре тарафынан тәүлек әйләнәһенә алып барыла, - ти “Урмансылыҡтар идаралығы” дәүләт ҡаҙна учреждениеһының “Бөрйән урмансылығы” бүлеге начальнигы вазифаһын ваҡытлыса башҡарыусы Эльмир Мәзитов.

Ағымдағы йылда Башҡортостан Башлығы Радий Хәбиров менән Тура бәйләнеш 11 ноябрҙә киске сәғәт 7-лә республиканың төп киң мәғлүмәт сараларында һәм социаль селтәрҙәрҙә тура эфирҙа үтәсәк.

Республика етәксеһенә бер нисә ысул менән яҙма йә видеоһорау бирергә мөмкин:
-Башҡортостан Башлығының рәсми сайтындағы махсус бүлектә: vopros.glavarb.ru
-MAX милли мессенджерында чат-бот аша: max.ru/glavarb_pl...
- «Телеграм»да чат-бот аша: t.me/glavarb_pl...
- «Бәйләнештә» чат-бот аша: vk.me/glavarb_pl...
- «Одноклассники» селтәрендә чат-бот аша: ok.ru/group/7000...
- «Дәүләт хеҙмәттәре. Бергә хәл итәбеҙ» сервисында: pos.gosuslugi.ru/lkp/direct...

Әгәр ҙә һеҙ видеоһорау яҙырға уйлаһағыҙ, тәҡдимдәрҙе иғтибар менән өйрәнегеҙ:
- Видеояҙма башында исем-фамилияғыҙҙы, атайығыҙҙың исемен, ауыл йә ҡалағыҙҙы, районығыҙҙы әйтегеҙ, шунан ғына һорауығыҙҙы бирегеҙ.
- Мобиль ҡушымта аша һалғанда видеоның оҙонлоғо бер минуттан да артмаһын. Компьютерҙа 10 мегабайттан ашыу булырға тейеш түгел.
- Видеояҙманы яҡтыла төшөрөгөҙ. Һорау биреүсе кешенең йөҙө асыҡ күренһен, күләгә төшмәһен.
- Һорау биреүсенең артында тәҙрә, лампа йәки башҡа яҡтылыҡ сығанағы булмаһын.
- Видеоны яҙҙырғанда камераны горизонталь тотоғоҙ, шылдырмағыҙ. Камера ныҡ беркетелгән булһын.
- Видеоны телефондың фронталь камераһына селфи рәүешендә төшөрһәгеҙ ҙә горизонталь тотоғоҙ.
- Видеоһорау урамда яҙылһа, һеҙҙең тауыш яҡшы ишетелергә тейеш.
- Һорауҙы бер төркөм кеше бирһә, һәр береһенең йөҙө асыҡ күренһен, тауышы яҡшы ишетелһен. Мөмкинлек булғанда микрофон ҡулланығыҙ.
- Бер планда төшөрөгөҙ һәм ебәрерҙән алда видеояҙманы монтажламағыҙ.
- Яҙмаға музыка һалмағыҙ. Сит тауыштар булмаһын.
- Видеоның аҙағында һорауҙың Радий Хәбиров менән Тура бәйләнешкә булыуын әйтегеҙ.
Радий Хәбиров менән Тура бәйләнешкә видеоһорауҙар 10 ноябрь киске сәғәт 7-гә тиклем ҡабул ителә.