Радий Хәбиров төбәктең террорға ҡаршы комиссияһы ултырышын үткәрҙе

Көн тәртибендә - белем Көнөн байрам итеү осоронда, шулай уҡ урындағы үҙидараның вәкиллекле органдарына һайлауҙарҙа тауыш биреү ваҡытында йәмәғәт именлеген тәьмин итеү мәсьәләләре.

- Төп бурыс-уҡыусыларҙың тулы хәүефһеҙлеген тәьмин итеү. Кисә Бөрөлә август кәңәшмәһендә ошо теманы күтәрҙек. Ул уҡытыусыларҙы ла, ата – әсәләрҙе лә ныҡ борсой, - тип билдәләне Радий Хәбиров. - Бөтә белем биреү ойошмалары тикшерелгән дә инде. Дөйөм алғанда, террорҙан һаҡланыу яғынан хәл яҡшыра. Шуға ҡарамаҫтан, был теманы айырым контролдә тоторға кәрәк. Бөтә көстәр һәм средстволар республиканың теләһә ҡайһы нөктәһендә хәүефкә, йәмәғәт тәртибенә янауҙарға яуап бирергә әҙер булырға тейеш.

14 сентябрҙә, берҙәм тауыш биреү көнөндә, республикала 150 һайлау кампанияһын үткәрергә планлаштыралар. 256 һайлау участкаһы йәлеп ителәсәк.

- Уларҙы комиссия буйынса тикшерергә, объекттарҙың террорға ҡаршы яҡланыуына иғтибар бүлергә кәрәк, – тине Радий Хәбиров. - Көс ведомстволарының бурысы-оператив хәлде күҙәтеү, хоҡуҡ боҙоуҙарҙы ваҡытында туҡтатыу.

Ултырышта ҡатнашыусылар планлаштырылған саралар үткәрелгән осорҙа ведомство-ара үҙ-ара эш итеү тәртибен, шулай уҡ хоҡуҡ һаҡлау органдары, оператив һәм авария хеҙмәттәре эшенең төп йүнәлештәрен билдәләне.