Афған һуғышы ветерандары менән Батырлыҡ дәресе

Афған! Был һүҙҙәрҙе әйтеү менән күҙ алдына тау-ташлы рәхимһеҙ ҡояшлы афған ере килеп баҫа. Был һуғыш беҙҙең илгә 15 меңгә яҡын ҡурғаш табут, 36 мең яралы, 312 хәбәрһеҙ юғалған һалдат рәүешендә әйләнеп ҡайта.
Күп йылдар үтте, әммә ул ерҙәрҙә булған ваҡиғалар бөгөнгәсә күптәрҙең йөрәгендә ауыр яра булып һаҡлана.
15 февраль - яугир-интернационалистарҙы иҫкә алыу көнө. Беҙҙең ауылдан да Афған һуғышында ҡатнашыусылар бар, ошо байрам уңайынан мәктәптә ауыл мәҙәниәте хеҙмәткәрҙәре менән берлектә башланғыс класс уҡыусылары өсөн батырлыҡ дәресе үтте. Ҡунаҡҡа Афған демократик республикаһынан Совет ғәскәрҙәрен сығарыуға 36 йыл тулыуы айҡанлы Афған һуғышы ветерандарын саҡырҙыҡ. Әхнәф Алтыншин, Радик Ҡасимов, Илдар Усманов ағайҙар алыҫта тороп ҡалған һалдат йылдарын иҫкә төшөрөп, хәтирәләре менән уртаҡлаштылар. Уҡыусылар үҙҙәрен ҡыҙыҡһындырған һорауҙарға яуап алдылар. Бер миҙал тарихы, ундағы халыҡтың йәшәйеше, йолалары, әрме тормошо тураһында йәнле әңгәмә йырҙар менән үрелеп барҙы.
Дәрес изге еребеҙҙе илбаҫарҙарҙан һаҡлап ҡалған, уның именлеге өсөн ғүмерен дә ҡыҙғанмаған Ватан һуғышы ҡаһармандары, Афған, Чечен ерҙәрендә һәләк булған, армия сафтарында хеҙмәт иткәндә йәш ғүмерҙәре ваҡытһыҙ өҙөлгән Башҡортостан улдарының яҡты иҫтәлегенә бағышлап стелаға сәскәләр һалыу, сәй табыны менән тамамланды.
Һуғыш уты бер ерҙә лә ҡабынмаһын, донъялар имен булһын.

Сығанаҡ: Әбделмәмбәт ауыл мәҙәниәт йорто төркөмө.