Кисә Яуымбай мәктәбенең ҙур залында Ололар көнөнә арналған бик матур сара үтте.

Байрамды башлап, мәктәптең етәксе урынбаҫары Сәйҙә Ғәбдинур ҡыҙы Сәйәхова ҡунаҡтарҙы ҡотланы.
Уҡыусылар оло быуын кешеләренә матур, дәртле йырҙарын, бейеүҙәрен бүләк иттеләр.

Мәктәптең профсоюз комитеты рәисе Хәлиҙә Мазһар ҡыҙы Назарова ветерандарыбыҙға ҡотлау һүҙҙәрен еткерҙе һәм мәктәп коллективы исеменән хөрмәтле мәғариф, хеҙмәт ветерандарына байрам бүләге тапшырҙы, ә инде 95 йәшен билдәләүсе иң оло ауылдашыбыҙ, оло ихтирамлы Әминә Мөбәрәк ҡыҙы Кинйәкәеваны ғүмер байрамы менән тәбриҡләп, мәктәптең иҫтәлекле бүләген тапшырҙы һәм бөтә оло быуын кешеләренең ауылыбыҙ йәме, ҡото булып оҙон - оҙаҡ йәшәүҙәрен теләне.

Сәйҙә Ғәбдинур ҡыҙы, ҡотлауҙарға ҡушылып, Яуымбай ауылының иң оло быуын вәкиле хөрмәтле Әминә Мөбәрәк ҡыҙы Кинйәкәеваға олуғ юбилейы айҡанлы Бөрйән районы Хакимиәте башлығының беренсе урынбаҫары Венера Фәрит ҡыҙы Вәлиеваның һәм район ҡатын - ҡыҙҙар советы Президиумы рәисе Рәмилә Фәхретдин ҡыҙы Салауатованың ҡотлауҙарын еткереп, уларҙың бүләктәрен тапшырып үтте.

Ҡунаҡтарҙы хөрмәтләп, ауылдың китапханасыһы Разия Искәнйәр ҡыҙы Кинйәкәева бүләктәрен тапшырып, матур теләктәрен еткерҙе.
Байрамға килгән оло быуын кешеләренең бер-береһенә әйтәһе һүҙе бик күп ине.

Хушлашыр алдынан ауылыбыҙҙың абруйлы ағинәйе, 95 йәшлек юбилейын билдәләүсе Әминә инәй Кинйәкәева һәм мәктәптең ветерандар Советы рәисе, мәғариф ветераны Айһылыу Сабирйән ҡыҙы Мәсәғүтова ошо байрамдың, ошондай осрашыуҙарҙың ни тиклем әһәмиәтле икәненә баҫым яһап, ойоштороусыларға ҙур рәхмәт һүҙҙәрен, изге теләктәрен еткерҙеләр.
Кисәнән һуң, иҫтәлеккә байрам фотозонаһында фотоға төшөү, ашханала ҡунаҡтарға тәмле сәй табыны ойошторолдо. Музыкаль һәм һый-ниғмәтле күстәнәстәрҙән ауыҙ иткән өлкәндәр үҙҙәренә ойошторолған байрамға, күрһәтелгән иғтибарға һәм ихтирамға күңелдәре күтәрелеп, ҡәнәғәт булып таралышты.

Бергәләшеп күңел асып, интеллектуаль уйында ҡатнашып, таралышты ауылдаштар. Ә беҙ инде, үҙ сиратыбыҙҙа, оло йәштәге апай - ағайҙарға киләсәктә ныҡлы һаулыҡ, оҙон ғүмер, бәхетле ҡартлыҡ, донъяларҙың имен тороуын теләп, киләсәк тә лә ошолай йыйылышып, бер-береһен һаулыҡта ғына күреп тороуҙарын теләп ҡалдыҡ.

Сәйҙә Сәйәхова