Рәсәй сит ил эштәре министры Сергей Лавров менән осрашыу

Осрашыу башында Башҡортостан Башлығы министрға Башҡортостандың мөмкинлектәрен киң аудиторияға күрһәтеү мөмкинлеге өсөн рәхмәт белдерҙе. Дипломатик хеҙмәткәрҙәр һәм төрлө кимәлдәге эксперттар араһында шул иҫәптән сит илдекеләр ҙә бар ине.

– Был республикабыҙ үҫеше өсөн мөһим аҙым. Беҙҙең әүҙем тышҡы иҡтисади эшмәкәрлек алып барыуыбыҙ һәм һуңғы йылдарҙа Һеҙҙең министрлыҡ ярҙамы менән сит илдәрҙә күп һанлы сауҙа вәкиллектәребеҙ асылыуы хаҡында беләһегеҙ, – тип билдәләне Радий Хәбиров. – Мәҙәни һәм гуманитар бәйләнештәр әүҙем киңәйә. Айырыуса төп партнерҙарыбыҙ булған Белоруссия һәм Ҡаҙағстан менән тығыҙ хеҙмәттәшлек итәбеҙ. Ә Абхазия менән хеҙмәттәшлек сиктәрендә быйыл Өфөлә башҡорт һәм абхаз халыҡтарының дуҫлығын сағылдырған колоннада асырға ниәтләйбеҙ.

Рәсәйҙең Сит ил эштәре министрлығы башлығы республиканың, идара итеү командаһы тырышлығы менән, иҡтисадты, шулай уҡ мәҙәни һәм спорт өлкәһен үҫтереү буйынса Рәсәйҙә алдынғы позицияларҙы һаҡлап ҡалыуын һыҙыҡ өҫтөнә алды.

– Башҡортостан был йәһәттән – илебеҙҙең йөҙө. Һеҙгә әүҙем тышҡы иҡтисади эшмәкәрлегегеҙ өсөн рәхмәт белдерәм. Бынан тыш, төбәктә спорттың яҡшы темптар менән үҫешеүен дә беләм. Атап әйткәндә, Өфөлә ишкәкле слалом комплексы төҙөлөшө бара. Был донъя кимәлендәге заманса ҡоролма, – тине Сергей Лавров. – Республика вәкиле Алһыу Минәзова – слалом буйынса иң яҡшы спортсыларыбыҙҙың береһе. Башҡортостан атлеттарына уңышлы сығыштар, яңы сағыу еңеүҙәр теләйем.

Республика Башлығы Радий Хәбиров Сергей Лавровты 2024 йылдың йәйендә һәм көҙөндә уҙасаҡ Өфөнөң 450 йыллығына арналған сараларҙа ҡатнашырға саҡырҙы.

***

Рәсәйҙең сит ил эштәре министры Сергей Лавров һәм төбәк Башлығы Радий Хәбиров Башҡортостан экспозицияһын да ҡараны. Ул Рәсәй Сит ил эштәре министрлығы ҡарамағындағы дипломатик корпусты хеҙмәтләндереү буйынса Баш производство-коммерция идаралығының мәҙәни үҙәге майҙансығында урынлашҡан. Бында социаль-иҡтисади үҫеш өлкәһендәге ҡаҙаныштар, төбәктең үҙенсәлекле тәбиғәте матурлығы һәм мәҙәниәте тәҡдим ителде.

Сергей Лавров һәм Радий Хәбиров экспозицияны ҡарауҙы традицион күсмә тирмәнән башланы, унда ҡунаҡтарҙы республика халыҡтарының көнкүреше һәм милли аш-һыуы менән таныштырҙылар. Рәсәйҙең сит ил эштәре министрына солоҡ балын нисек алыуҙарын да күрһәттеләр. Радий Хәбиров бындай боронғо технологияның Башҡортостанда ғына һаҡланып ҡалыуы тураһында һөйләне.

– Бөрйән солоҡ бал ҡортон һаҡлау өсөн түмәр-солоҡ умартасылығына ярҙам итеү программаһын ҡабул иттек һәм Бөрйән районы биләмәһендә махсус заказник булдырҙыҡ, – тип билдәләне Радий Хәбиров.

Экспозицияла үҙәк урындарҙың береһен легендар хәрби етәксе, Рәсәй Геройы, генерал-майор Миңлеғәле Шайморатов һәйкәленең масштаблы күсермәһе биләй. Төбәк Башлығы Сергей Лавровҡа һәйкәлдең Өфөнөң Совет майҙанында Ватанды һаҡлаусылар хөрмәтенә ҡуйылыуы хаҡында һөйләне.

Экспозицияны ҡарау сиктәрендә ишкәкле слалом буйынса Рәсәй чемпионы, донъя Чемпионатының бронза призеры Алһыу Минәзова видеоэлемтә аша илдең Ишкәкле слалом федерацияһының Попечителлек советы рәйесе Сергей Лавровҡа спортҡа әүҙем ярҙам күрһәтеүе өсөн рәхмәт белдерҙе. Алһыу Минәзова Рәсәй сит ил эштәре министрын шулай уҡ 2024 йылдың көҙөндә Өфөлә үтәсәк «Рәсәй – спорт державаһы» халыҡ-ара форумына саҡырҙы. Башҡортостандың спорт министры Руслан Хәбибов спортсының үтенесе буйынса Рәсәй Сит ил эштәре министрлығы Башлығына «Донъя мәсьәләләрен хәл итеү өсөн» тигән яҙыулы ишкәк тапшырҙы, уның менән Алһыу Минәзова 2021 йылда Токиола үткән Олимпия уйындарында ҡатнашҡан.

Сергей Лавров һәм Радий Хәбиров шулай уҡ «Янғантау» геопаркы һәм Шүлгәнташ мәмерйәһе үҫешенә арналған стендтарҙы ҡараны.

Башҡортостан башлығы сайты