+28 °С
Болотло
Йәмғиәт
20 Сентябрь 2022, 05:45
Башҡортостанда эшһеҙлек кимәле тарихи минимумға ҡайтты
2022 йыл башынан Башҡортостанда теркәлгән эшһеҙҙәр һаны 22,2 меңдән 20,1 мең кешегә тиклем кәмегән. Халыҡ-ара хеҙмәт ойошмаһы методологияһы буйынса эшһеҙлек кимәле санкцияға тиклемге күрһәткескә - 3,6 процентҡа әйләнеп ҡайтҡан - ул үҙенең тарихи минимумын ҡабатлаған.
Башҡортостанда эшһеҙлек кимәле тарихи минимумға ҡайтты
Бындай мәғлүмәттәр менән республиканың ғаилә, хеҙмәт һәм халыҡты социаль яҡлау министры Ленара Иванова Башҡортостан Башлығы Радий Хәбиров уҙғарған аҙналыҡ оператив кәңәшмәлә таныштырҙы. - Хеҙмәт баҙарында тотороҡло хәл булыуға ҡарамаҫтан, ҡайһы бер дәүләттәр тарафынан санкциялар индереү эҙемтәләре арҡаһында хеҙмәткәрҙәрҙе эштән бушатыу хәүефе бар. Әммә бында ла ыңғай динамика күҙәтелә, - тине Ленара Иванова. - Июль аҙағында тулы булмаған мәшғүллектең иң юғары нөктәһе теркәлде - эштән бушатылыу хәүефе янаған хеҙмәткәрҙәр һаны 20 мең кешегә етте. Ә 16 сентябргә был күрһәткес 6,5 мең кешегә кәмегән. Бынан тыш, Рәсәй Пенсия фонды мәғлүмәттәре буйынса, 1 сентябрҙән «эшкә алынғандар минус эштән сығарылғандар» ыңғай сальдоһы күҙәтелә, ул 3 235 кеше тәшкил итә. Йәғни эшкә алған кешеләр һаны эштән ҡыуылғандар һанынан күберәк.
Республиканың ғаилә, хеҙмәт һәм халыҡты социаль яҡлау министры ҡала һәм райондарҙағы мәшғүллек үҙәктәренең яҡшы профилактик эшен билдәләне.
- Предприятиелар менән шәхси пландар буйынса тығыҙ эш итәбеҙ. Ваҡытында халыҡҡа һәм эш биреүселәргә мәшғүллек структураһы үҙгәреүе тураһында мәғлүмәт бирәбеҙ, - тип аңлатты Ленара Иванова.
Башҡортостан Башлығы республиканың Хеҙмәт министрлығына муниципалитеттар менән берлектә мәшғүллек баҙарындағы процестарҙы контролдә тоторға ҡушты. - Урындағы предприятиеларҙағы хәлгә иғтибарлы ҡарағыҙ. Ваҡытында уларға иғтибар итеү өсөн хәүефтәрҙе аныҡ анализлағыҙ, - тип йомғаҡ яһаны Радий Хәбиров.
