+25 °С
Облачно
Новости
18 Августа , 16:12
Ҡурсаулыҡта башҡорт тирмәһе асылды
"Башҡорт тирмәһе" экологик-ағартыу майҙансыҡтың проектын «Динарҙар менән турҙар һәм йылға буйлап ағыу» («Туры и сплавы с Динарлар») ғаилә турфирмаһы бойомға ашырҙы. Әйткәндәй, Динар һәм Динара Байегетовтар был проект менән федераль конкурста ҡатнашып иң яҡшы проект авторҙары булараҡ конкурстың 5 еңеүсеһе исемлегенә ингәйне. Грант экологик башланғыстарҙы хуплаусы "Йәшел юл" фонды һәм Greenway Global кампанияһы тарафынан тормошҡа ашырыла. "Башҡорт тирмәһе" проектын «Динарҙар менән турҙар һәм йылға буйлап ағыу» ғаилә турфирмаһы "Шүлгәнташ" дәүләт тәбиғәт ҡурсаулығы менән берлектә башҡарып сыҡҡан.
Ҡурсаулыҡта башҡорт тирмәһе асылды
Тирмәне тантаналы асыу сараһына - Динар һәм Динара Байегетовтарҙың шатлығын уртаҡлашырға район хакимиәте башлығы урынбаҫары Зөһрә Хәйбуллина, "Шүлгәнташ" ҡурсаулығы директоры Михаил Косарев, Башҡорт дәүләт тәбиғәт ҡурсаулығы директоры Айнур Бейембәтов, Кейекбай ауыл биләмәһе башлығы Азамат Алтыншин, Ырғыҙлы ауыл биләмәһе башлығы Ильвир Сәйфуллин, башҡорт тирмәһе һәм этнография буйынса белгес-консультант Алина Иманғолова, Ғәҙелгәрәй ауылының "Йәнбикә" фольклор ансамбле, "Башҡортостан" милли паркы вәкилдәре, туристар һәм башҡа ҡунаҡтар йыйылды.
Сәләмләү һәм ҡотлау сығыштарынан һуң Динара Байегетова тирмә эсенә ҡуйыу, фотоға кейеп төшөү өсөн алынған башҡорт милли кейемдәре менән таныштырҙы. Сараны "Йәнбикә" фольклор ансамбле таҡмаҡтар, Сафия Һөйөшева "Һомай" бейеүе менән биҙәне. 6 йәшлек Аня Евграфова "Урал батыр" эпосынан оҙон өҙөк һөйләп барыһын да таң ҡалдырҙы.
Башҡорт тирмәһендә ҡунаҡтар һәм туристар башҡорт халҡының боронғо көнкүреше, мәҙәниәте, йәшәү рәүеше менән таныша ала. Байегетовтар тирмәгә экскурсия үткәреп кенә ҡалмай, ә теләүселәргә унда йәшәү мөмкинселеге лә бирә. Шулай уҡ башҡорт милли кейемдәрендә фотоға төшөп, шунда уҡ фотоны эшләтеп алырға ла була. Ҡыҫҡаһы, биш тапҡыр ишеткәнсе, бер тапҡыр барып күреүең яҡшы).
Б.Тимерғәлиевтың фотоларын һылтанма аша үтеп ҡарай алаһығыҙ: https://vk.ru/tan_gazite?z=album-13580677_310546216
