Район газетаһын яҙҙырыу буйынса изгелек акцияһына ҙур теләк менән тағы ла ҡушылам.

Рәсәй Оборона министрлығы менән контракт төҙөп хәрби әҙерлек үтергә юлланған яугирҙың ғаиләһенә 2024 йылдың беренсе ярты йыллығына “Таң” гәзитенә подписка бүләк иттем.

"Изге подписка", "Таң менән изгелек ҡыл", "Һәр өйгә -Таң" акцияларының маҡсаты бер – халыҡты районыбыҙҙың берҙән-бер башҡорт телендә сыҡҡан милли баҫмаһын уҡыуға йәлеп итеү менән бер рәттән, теләге булып та, ниндәйҙер сәбәптәр арҡаһында гәзиткә яҙылырға мөмкинселеге булмаған һәм күп балалы, аҙ тәьмин ителгән ғаиләләргә, махсус хәрби операцияла ҡатнашыусыларҙың ғаиләләренә, оло йәштәгеләргә, ветеран-уҡытыусыларға “Таң” гәзитенә подписка бүләк итеп һөйөндөрөүгә ҡайтып ҡала.

Дуҫтар! Изгелек акцияларында теләгән һәр кем ҡатнаша ала. Бының өсөн сиратҡа торорға ла, кемдеңдер эстафетаны һеҙгә тапшырыу-тапшырмауы ла мөһим түгел. Бары тик кемгәлер яҡшылыҡ эшләү, изгелек ҡылыу, ярҙам итеү теләге генә булһын.