Мәктәптәрҙә туҡланыуҙы ойоштороуҙы тикшереү башланды

Ауылдарҙа халыҡ менән танышыу, йәшәйешен яҡшыраҡ белеү маҡсаты менән үткән йыйылыштарҙа ла район хакимиәте башлығы мәктәптәрҙә туҡланыу тураһында һорашып, ата-әсәләрҙең фекерен асыҡлай. “Мәктәпкә аҙыҡ-түлек ташыусы эшҡыуарҙарҙан юғары сифатлы тауар талап итергә, аҙыҡ-түлекте ҡабул итеп алғанда ныҡ иғтибарлы булырға, ҡулланыу мөҙҙәте сыҡҡандарынан шунда уҡ баш тартырға кәрәк. Артабан да мәктәп ашханаларына күсмә тикшереүҙәр ойоштороласаҡ. Шуға балаларҙың туҡланыуын тәьмин итеү мәсьәләһенә айырым иғтибар бүлергә саҡырам”, - тине Рәмил Миңлеәхмәт улы.

Республика башлығы Р. Хәбиров менән үткән тура бәйләнеш ваҡытында мәктәптәрҙә туҡланыу сифатлы булыуына ҡарамаҫтан, туҡланыу стереотиптары икенсе булған балаларҙың тәҡдим ителгән аш-һыуҙан баш тартыуы, шуға күрә берҙәм менюға үҙгәрештәр индерергә кәрәклеге хаҡында тәҡдим булды.

Радий Фәрит улы: “Мәктәптәрҙә  туҡланыуҙы юлға һалыу – минең тәүгеләрҙән тотонған эштәрҙең береһе булды. Хәҙер был тәңгәлдәге ялыуҙар һаны кәмене, тотороҡло система булдырылды. Был эште артабан яҡшыртыу, менюны индивидуалләштереү өсөн яңы идеялар һәм стандарттар индереү талап ителә”, - тине.