Һайлауҙарға изге күңел менән килдем,

87-се йәш менән барһам да, таяғыма таянып булһа ла һайлау участкаһына үҙем килеп һайлауҙы хуп күрәм.
Теләктәрем дә изге: ил -көн имен булһын, беҙ һайлаған түрәләр имен - һау эшләһен, уландар МХО -нан имен - һау ҡайтһын, батшаларға - һаулыҡ, хөкүмәтте ҡыйратмай, ҡулға алып эшләһен.
Пенсияһын биреп торалар, асыҡмайбыҙ - барына шөкөр ",-ти Һәҙиә Фазылғүмәр ҡыҙы.

Һәҙиә инәй үҙенең биш балаһы өҫтөнә мәрхүмә оло ҡыҙының ҡыҙын да көтөп үҫтергән. Ейәнсәрем Ырғыҙлыла хәҙер үҙе 4 бала әсәһе булып матур йәшәп ята. Балалар килеп ярҙам итеп тора. Беҙҙең быуынға уҡыу эләкмәне. 7-се класты бөткәс, фермала ике йыл һыйыр һауҙым, кейәүгә сыҡҡас, 4 йыл совхозда бейә һауҙым, йәш балалар менән гел сезонлы эштәрҙә йөрөнөм - ырҙында иген эше менән булдыҡ, урып-йыйыу эштәре, бесәне ҡалманы, ти ғүмере эштә үткән ағинәй.

Ғәҙелгәрәйҙәге 1642-се УИК -тағы һайлаусылар теҙмәһендә 267 кеше торһа, 15 мартта - 142, кисә - 53,бөгөн 11:25 сәғәткә 15 кеше тауыш биргән. УИК рәйесе әйтеүенсә, был - теҙмәләге һайлаусыларҙың 79% -ы үҙ тауышын биргән, тигән һүҙ.
Кисә 14 оло быуын һайлаусыһының өйөнә барып һайлатһалар, бөгөн 5 кешегә барырға иҫәп тоталар.