"Кисә 7 бала мөрәжәғәт итте", тине педиатр

Каникулдар дауам итә. Ләкин төрлө миҙгелле инфекциялар, башҡа сирҙәр өсөн ял юҡ. Шуға, хәбәр итеүебеҙсә, район үҙәк дауаханаһында табиптар халыҡты каникул осоронда ла ҡабул итә.

Табип-педиатр Нургизә Бәхтиәр ҡыҙы Дәүләтбаева менән шәфҡәт туташы Миңзәлә Факил ҡыҙы Шәрипова эш урынында.

-Кисә, 3 ғинуарҙа, 7 баланы ҡабул иттек. Улар ОРЗ (киҫкен респираторлы сир) менән мөрәжәғәт итте. Температуралары күтәрелгән, йүткерәләр. Бер баланы дауаханаға һалдыҡ, ҡалғандары өйҙә дауаланасаҡ, - ти табип.

Нургизә Бәхтиәр ҡыҙы сығышы менән Баймаҡ районының беҙҙең районға яҡын ғына ятҡан Муллаҡай ауылынан икән. Былтыр медицина университетын тамамлағас, Бөрйәнгә эшкә килгән.

-Ныҡ һыуыҡ булмаған көндәрҙә балаларҙы күберәк саф һауала уйнатығыҙ. Шул уҡ ваҡытта халыҡ күп йыйылған урындарға йөрөмәй тороу, битлек режимын, дистанция һаҡлау мөһим, - тине педиатр.

Ә Миңзәлә Факил ҡыҙы Иҫке Собханғолда тыуып-үҫкән. Медицина тармағында – 2005 йылдан, педиатрия бүлегендә 2012 йылдан эшләй.

Ал-ял белмәй райондаштарҙың һаулығы һағында хеҙмәт иткән медицина хеҙмәткәрҙәренә эштәрендә уңыштар, именлек теләйек. Барыбыҙ ҙа имен-аман булайыҡ.