Каникулда аҡса эшләйҙәр

Район үҙәгендә уҡыусы ҡыҙҙар каникул осорона Озон һәм Вайлдберриз тауар биреү пункттарына эшкә урынлашҡан. Бында ҡыҙҙар курьер һөнәрен үҙләштергән, штрих-кодтар теркәлгән этикеткаларҙы тауар алыусының белешмәләре менән заказ ҡаптарына дөрөҫ йәбештерергә, посылкаларҙы базаға индерергә өйрәнгән. Улар шулай уҡ клиенттар менән аралашыу оҫталығын үҫтерә.

- Үҙ аллы аҡса эшләү – атай-әсәйгә матди яҡтан ярҙам итеү өсөн яҡшы мөмкинлек. Әҙ булһа ла, ғаилә бюджетына өлөшөмдө индерә аулыуым менән ҡыуанам, - тип тәьҫораттары менән уртаҡлашты ҡыҙҙарҙың береһе.

-Бөтә ҡыҙҙар ҙа сос, тырыш, эштәрен урын-еренә еткереп башҡаралар, - тип белдерҙе тауар биреү пункты етәксеһе Оксана Билалова. Бөрйән районы буйынса мәшғүллек үҙәге етәксеһе Н. Ишкилдина хеҙмәттәшлек өсөн Оксана Салауат ҡыҙына рәхмәтен еткерә.

Мәшғүллек үҙәге хеҙмәткәрҙәре уҡыусыларҙың хеҙмәт эшмәкәрлегенә яраҡлашыуында ярҙам күрһәтә, бәлиғ булмағандарҙың хеҙмәт хоҡуҡтарын үтәүҙе контролдә тота, үҫмерҙәр өсөн эш урындары һәм бәлиғ булмаған граждандарға матди ярҙам күрһәткән эш биреүселәргә лә ярҙам итә.

-Йәйге каникулдар осоронда эшләргә теләгән уҡыусылар мәшғүллек үҙәгенә мөрәжәғәт итә ала. Беҙҙең адрес: Иҫке Собханғол ауылы, Салауат урамы, 30 (2-се ҡат). Киләсәктә үҫмерҙәрҙе йәйгелеккә эшкә урынлаштырыуға йәлеп итеүсе эш биреүселәр һаны артыр, тип өмөтләнәбеҙ, - тиҙәр мәшғүллек үҙәге хеҙмәткәрҙәре.