Донъя тәүәккәлдәр ҡулында

Бөгөн берәүҙәр ауылда эш юҡлыҡҡа һылтанһа, икенселәр тормош дилбегәһен үҙ ҡулына алып, матур итеп донъя көтөргә тырыша. Халыҡты хеҙмәтләндереү өлкәһендә эш алып барған Данил һәм Гөлназ Кәримовтар шундай йүнсел, тырыш, тәүәккәл ғаиләләрҙең береһе. Район үҙәгендәге «Һинең стилең» ательеһы хужабикәһе Гөлназ кейем-һалым текһә, Данил үҙенең ремонтлау үҙәгендә бысҡылар йүнәтә.

-Мин бала саҡтан дизайнер булырға хыялландым. Ул һөнәр буйынса уҡырға инергә мөмкинселек булманы, икенсе уҡыу йортон тамамланым. Шулай ҙа хыялымды күп йылдар күңелемдә йөрөттөм. Кейәүгә сығып, тәүге бәпес менән декрет ялында ултырғанда тегенсегә уҡып алдым. Хыялыма табан беренсе аҙым булды был, – ти Гөлназ.
2000 йылға тиклем Гөлназ ата-әсәһе, ҡустыһы менән Ҡаҙағстанда йәшәгәндәр. Машинкала тегергә 10 йәштәр тирәһендә атаһынан өйрәнгән.

-Атайым менән әсәйем заводта эшләнеләр. Атайым эш кейемен теген машинкаһында үҙе йүнәтеп ала торғайны. Ҡыҙыҡһынып, тегеп ҡарарға өмөтләнеп ултырыуымды күреп, миңә лә өйрәтергә булды. Тик һулаҡай булғас, килеп сыҡмай ҙа ҡуя. Ахыры, өҫтәлгә менеп, машинканың арт яғынан һул ҡул менән киреһенсә тегеп ҡараным. Шулай өйрәнеп китеп, ҡурсаҡтарыма, аҙаҡ әсәйемдең кейемдәрен ҡырҡып, үҙемә күлдәктәр тегеп алдым, – тип хәтерләй тегенсе.

Мәктәпте тамамлағандан һуң мәшғүллек үҙәге аша ПВМ операторына уҡып, ошо һөнәр буйынса дауаханала эш башлай. Ситтән тороп иҡтисадсы, һалым буйынса белгескә уҡый. Аҙаҡ, мәғлүмәт-консультация үҙәгендә белгес булып эшләгән осоронда, үҙ эшен асырға ҡарар итә.

-Оҙаҡ уйлап, икеләнеп йөрөгәндә, килендәшем Зөлфиә мине дәртләндереп, 2018 йылда ательены асып ебәрҙек. Азалия килендәшем үҙенең сауҙа үҙәгенән бүлмә бирҙе. Үҙебеҙҙең көс менән теген машинкаһы, оверлок һатып алдыҡ. Тәүге осор тегенселәр яллап эшләнек. Көндөҙ төп эшемдә, кискеһен ательеға заказдарҙы үтәргә йүгерә торғайным. Икенсегә декрет ялына сыҡҡас, тулыһынса эшемә бирелдем. Урал урамындағы бинаға күстек. Әле Әлфиә апай Ишкилдина материалды бесеп бирә, мин тегәм. Шулай уҡ халыҡҡа шторҙар, тюль, мендәр, юрған, постель кәрәк-яраҡтары тәҡдим итәбеҙ. Бүлмәнең икенсе яғында Зөлфиә көндәлек тауарҙар һәм балалар кейеме магазинын булдырҙы. Тағы ла бер ярҙамсы алырға уйлап торабыҙ,– ти Гөлназ.

Гөлназ бешеренергә, баҡсала сәскә үҫтерергә лә ярата. Иптәше Данил менән Вилдан һәм Лияна исемле балалар үҫтерәләр. Айырым йорт һалһалар ҙа, ҡайны һәм ҡәйнәһен ҡарашып, улар менән бергә торалар. Ғаиләлә иң бәләкәйе булараҡ, Данил ата-әсәһен ҡарауҙы үҙенең бурысы итеп алған.

Материалдың тулы вариантын "Таң" гәзитенең 23 март һанынан уҡығыҙ.