Картуф мөғжизәһе йәки Салауат уңғаны картуфтан нисек юғары уңыш алған?

“Һаран ике түләй, ә уңған ике тапҡыр артығыраҡ йыйып ала”: картуфтан рекорд уңыш алған уңғандың тарихы.

Салауат районының Мәсетле ауылында йәшәүсе Ирек Мофазалов менән булған тарих ҡайһы саҡ күңел ҡайтыуы, рух төшөүе лә уңышҡа әйләнеүе мөмкин икәнен дәлилләй. Күп баҡса ултыртыусылар бигүк шәп булмаған уңыштарын һанаған мәлдә был фермер ысын-ысындан күңел ҡыуанысы кисерә. Нисекме?
Барыһы ла уңышһыҙлыҡтан, күңел төшөүенән башлана. Йәйгеһен Ирек яҙғыһын ултыртылған картуфының уңышы насар булыуға көйөнә – тәбиғәт һәм һауа торошо үҙ эшен эшләй. Шулай ҙа ир кеше ҡул һелтәмәй, күңел төшөнкөлөгөнә бирелмәй. Баҫыуҙағы игенен йыйып алғас, 9 августа, ул ғәҙәти булмаған ҡарарға килә: яҙ сәскән картуфы уңмаған ергә... ҡалған ғына былтырғы картуфын сәсеп сыға. Күптәр мәғәнәһеҙгә, бушҡа ваҡыт үткәреү тип иҫәпләгән экспериментты яһап ҡарай.

Өс аҙна тирәһенән үк – 27 августа уҡ Ирек барыһын да аптыратҡан видеояҙмаһын интернетҡа ҡуя. Кадрҙарҙа – тигеҙ,  матур үҫеп ултырған картуф һабаҡтары. Ҡәҙимге мәлдә сәселгән картуф һабаҡтарын тишкеләп, кимереп бөткән колорад ҡуңыҙының эҙе лә юҡ. Фермер һаҡ ҡына оптимизм менән: “Әгәр бер-бер хәл булмаһа, октябрҙә яҡшы уңыш йыясаҡмын”, тип яҙа.

Һәм бына ысынбарлыҡ мәле етә. 11 октябрҙә Ирек картуфын ҡаҙа башлай. Ә һөҙөмтә барлыҡ өмөттәрҙе, көтөүҙәрҙе лә үтеп китә. “Мин участканың яртыһын буш ҡалдырырмын тигәйнем. Ә ер ике тапҡырға артығыраҡ уңыш бирҙе!” – ти фермер. Ярты түтәлдән ул ғәҙәттә бөтә делянкаһынан йыйған картуфты ҡаҙып ала.

Бына шулай, һаҡсыллыҡ һәм хеҙмәт һөйөүсәнлек, хатта картуфты бик һуң ултыртҡан хәлдә лә, мөғжизәләр тыуҙырырға һәләтле!

Мәсетле тарихы – үҙҙәренең баҡсаларына ҡарап эстәре бошҡандар өсөн бик яҡшы миҫал. Иң мөһиме – үткән йылғы запастар тураһында мәлендә иҫкә төшөрөргә һәм эксперименттарҙан ҡурҡмаҫҡа!

Сығанаҡ: https://vk.ru/telekanal_salyam