”Турникеттарһыҙ аҙна”. Бөрйән районы хакимиәтенә экскурсия

“Турникеттарһыҙ аҙна” Бөтә Рәсәй акцияһы сиктәрендә Бөрйән районы мәшғүллек үҙәге Иҫке Собханғол урта дөйөм белем биреү мәктәбенең 11 “А” класы уҡыусылары өсөн район хакимиәтенә экскурсия ойошторҙо.

Уҡыусыларҙы хакимиәттең эштәр менән идара итеүсеһе Илфат Әсхәт улы Ғәлин ҡаршы алды һәм кабинеттар буйлап алып йөрөнө, хакимиәттең структураһы, бурыстары, көндәлек эшмәкәрлеге хаҡында бәйән итте. Шулай уҡ урындағы үҙидаралыҡ органдарында эштең нисек ойошторолоуы менән таныштырҙы.

Уҡыусылар район хакимиәте башлығы урынбаҫарҙарының кабинеттарында булды, төрлө бүлектәрҙең хеҙмәткәрҙәре менән әңгәмәләште, уларҙың һәр ҡайһыһы нимә менән шөғөлләнә икәнен ғәмәлдә күрҙе – балалар уларҙың документтар әйләнешенән алып район халҡының мәсьәләләрен хәл итеүгә тиклем эштәр алып бара икәнен белде.
Район хакимиәте башлығы вазифаһын башҡарыусы А. Ҡотошов менән осрашыу уҡыусыларҙың күңелендә айырыуса иҫтә ҡалыр мәл булғандыр. Осрашыу ихлас аралашыу рәүешендә үтте: уҡыусылар бик әүҙем һорауҙар бирҙе, Айнур Миңлеғәле улы уларға яуап биреп кенә ҡалманы, уҡыусылар менән ололар менән аралашҡан кеүек итеп аралашты. Белем алыуҙың мөһимлеге, мәктәп инициативалары районды үҙгәртеүе мөмкин икәнлеге һәм киләсәк өсөн шәхси яуаплылыҡ тураһында барҙы һүҙ. Ул уҡыусыларҙы яҡшы уҡырға, буласаҡ һөнәрҙәрен һәр яҡтан уйлап, аңлап һайларға һәм райондың һәм мәктәптең йәмәғәт тормошонда әүҙем ҡатнашырға саҡырҙы.

Бындай экскурсиялар уҡыусыларға муниципаль хеҙмәттең “кухняһын” күререгә һәм әлеге ваҡытта ниндәй белем айырыуса кәрәк икәнен аңларға ярҙам итә.

Сығанаҡ: https://vk.ru/club165617210