Баҙал биҫтәһендә ГТО майҙансығы асылды

ГТО комплексы майҙансыҡтарын ҡуйыу буйынса эш “Рәсәй спорты” дәүләт программаһы сиктәрендә алып барылды.

Яңы спорт объектын асыу хоҡуғы район хакимиәте башлығы Рәмил Абдуллинға, Рәсәй Федерацияһы Дәүләт Думаһы депутаты Зариф Байғусҡаровҡа һәм БР Дәүләт Йыйылышы - Ҡоролтай депутаты Рәмзиә Кәримоваға бирелде.

-Физик культураны һәм спортты үҫтереү һәр ваҡыт беҙҙең өҫтөнлөклө бурыстарҙың береһе булып тора. Рәсәй Федерацияһының спорт министрлығы ярҙамы менән Бөрйән районы ГТО майҙансығын төҙөү өсөн сертификатҡа эйә булды. Бындай объект районда тәүге түгел: 2021 йылда милли проект сиктәрендә ГТО майҙансығы Иҫке Собханғол ауылының һул ярында булдырылғайны, - тип белдерҙе район хакимиәте башлығы Рәмил Абдуллин.

Майҙансыҡта 26 спорт элементы ҡуйылған: тренажерҙар һәм швед стеналары, гимнастика эскәмйәләре һәм башҡа ҡорамалдар урынлаштырылған. Хәүефһеҙлек өсөн майҙансыҡҡа резина япма һалынған.