Үҫмерҙәр аҡса ла эшләй, стаж йыя ла башлай

Иҫке Собханғол ауылында “Был йәйҙә аҡса эшлә” тигән девиз аҫтында уҡыусыларҙы ваҡытлыса эшкә урынлаштырыу буйынса программа старт алды.

Райондың мәшғүллек үҙәге менән тығыҙ бәйләнештә булған эшҡыуар Мырҙағолова Илзидә Ишмырҙа ҡыҙы үҫмерҙәр өсөн эш урындары тәҡдим итте.

Биш бәлиғ булмаған үҫмер ашнаҡсы ярҙамсыһы итеп эшкә алынды. Предприятие етәксеһе был алымдың социаль әһәмиәтен һыҙыҡ өҫтөнә ала:

-Әгәр үҫмерҙәрҙең ундай теләге бар икән, беҙ уларға был мөмкинлекте бирергә, эш урындары булдырырға тейешбеҙ. Был мөһим эште киләсәктә лә дауам итергә кәрәк.

Бынан тыш, эш урындарында балаларҙың хәүефһеҙлеген тәьмин итеү мөһим – хеҙмәт хәүефһеҙлеге һис шикһеҙ үтәлергә тейеш.

Программала ҡатнашыусылар үҙҙәре лә алынған тәжрибәләрен ыңғай баһалайҙар. Эшкә урынлашҡан ҡыҙҙарҙың береһе: “Был минең тәүге эш тәжрибәм, ул миңә бик оҡшаны”, ти.

Бындай проекттар оҙайлы мөҙҙәткә иҫәпләнгән ыңғай эффектҡа эйә. Мәшғүллек үҙәге практикаһы күрһәтеүенсә, тәүге эш сирҡанысы алған үҫмерҙәр артабан эш эҙләүҙә нығыраҡ инициатива күрһәтә. Финанс үҙаллылығынан тыш, үҫмерҙәрҙең рәсми рәүештә стаждары иҫәпләнә башлай.  Был киләсәк өсөн мөһим.

Әүҙем хеҙмәттәшлеге өсөн мәшғүллек үҙәге шәхси эшҡыуар Илзидә Мырҙағоловаға рәхмәт белдерә һәм уның үрнәге башҡа эш биреүселәрҙе лә йәйге осорҙа үҫмерҙәрҙе эшкә йәлеп итеүгә илһамландырыр тигән өмөттә.

Эшләргә теләгән уҡыусыларға ҡайҙа мөрәжәғәт итергә һуң?

2026 йылдың йәйге каникулдары осоронда рәсми рәүештә эшкә урынлашырға теләгән уҡыусылар белешмә һорап райондың мәшғүллек үҙәгенә мөрәжәғәт итә алалар. Адресы: Иҫке Собханғол ауылы, Салауат урамы, 30 (2-се ҡат).

Сығанаҡ: https://vk.ru/club165617210