Гран-при - Бөрйән ҡыҙында!

Өфө фән һәм технологиялар университетының (элекке БДУ) башҡорт филологияһы , көнсығышты өйрәнеү һәм журналистика факультетының 1-се курс студенты, башҡорт телен һәйбәт белеүе арҡаһында (!!!) айына 58 мең стипендия алып уҡыусы Ҡолғанала тыуып үҫеп, Яуымбайҙа уҡып, аҙаҡ Өфөләге Рәми Ғарипов исемендәге гимназия-интернатта белем алып, башҡорт теле һәм әҙәбиәте буйынса төбәк-ара олимпиадаларҙа 5 йыл рәттән ҡатнашып,  призлы урындар яулап, СВОШ-та (төньяҡ-көнсығыш олимпиадаһы) призер булғаны өсөн УУНиТ-ҡа һынауһыҙ-ниһеҙ инеп, юғары стипендияға өлгәшкән Бөрйән ҡыҙы кисә үҙе уҡыған факультетта үткән  “Һылыуҡай” конкурсында   Гран-при яулаған!

Зөлхизәнең  - Ҡолғана ауылы  уҙаманы Әғләм Харун улы менән Яуымбай ауылынан Венера Һиҙиәт ҡыҙы Усмановтарҙың өсөнсө балаһы. Мәктәптә лә, гимназияла ла тырыш уҡыусы булды.

Уңған ҡыҙ вузда ла һынатмай – “Йәшлек” бейеү ансамблендә шөғөлләнә, “Байыҡ”та ла ҡатнашып өлгөргән, “Йәнгүзәл” этно-фольклор төркөмөндә ҡумыҙҙа уйнай,  этно-биҙәүестәр эшләү менән мәшғүл.

 “Әле  мин башҡорт һәм ҡытай теле уҡытыусыһы булырға белем алам.

Хыялым  - тормошта  үҙ урынымды табыу һәм бәхетле йәшәү, башҡорт теле уҡытыусыһы булараҡ,  балаларҙы иманлы, башҡорт рухлы итеп тәрбиәләү, үҫтереү. Рухым көслө, маҡсаттарым ныҡлы”, -ти Зөлхизә.

Эйе, бәғзеләр туған телдән йөҙ сөйөрөп, башҡорт теле нимә бирә, тип төптө яңылышҡанда, Бөрйән ҡыҙы Зөлхизә тел белеүҙең өҫтөнлөктәре менән файҙаланып, яңынан-яңы үрҙәр яулай.

Тел Төркөстанға илтер, ти халыҡ мәҡәле, Зөлхизәне тел белеүе Ҡытайға ла илтер, иншәә Аллаһ, Ҡытайға илтмәгәндә лә, шөкөр итерлек - уның кеүек шәп ҡыҙҙар үҙ еребеҙгә лә бик кәрәк!