Бөтә яңылыҡтар
Йәмғиәт
9 Ноябрь 2023, 19:15

Ниндәй һыуҙы һыуланың?

Һеҙ ниндәй һыуҙы һыуланығыҙ,әле эсәгеҙ,  йәмәғәт! Исемдәрен яҙабыҙ йылға-шишмә- ҡотоҡтарҙың. Улар ҙа бит – тарих.

Ниндәй һыуҙы һыуланың?
Ниндәй һыуҙы һыуланың?

Һәр кемдең күңел түрендә үҙенең бала саҡтан эсеп үҫкән һыуы – йылғаһымы, шишмәһеме, кескенә инешеме бер матур иҫтәлек булып һаҡланалыр, моғайын.

Беҙ иһә аҫҡы  (Заһит ҡотоғо тей ине ололар) һәм өҫкө ҡотоҡтан, уның эргәһендәге Зөмбөрҙәктән (тау итәгенә ҡатылған тимер торба-улаҡтан сылтырап ҡына ағып сыҡҡан шишмә) һыу ташып эстек. Ҙур ғаиләгә көнөнә, мунса яҡһаң, кер йыуһаң, 10-15-ләп көйәнтә һыу кәрәк ине. Ташыныҡ, һыу юлын а үлән үҫтермәнек. Ана шул эскән өс һыуымдың береһе ул Зөмбөрҙәк. Өҫкө ҡотоҡто иһә матур итеп кәртәләп ҡуйғандар.Рәхмәт ауылдаштарға!

Һеҙ ниндәй һыуҙы һыуланығыҙ,әле эсәгеҙ,  йәмәғәт! Исемдәрен яҙабыҙ йылға-шишмә- ҡотоҡтарҙың. Улар ҙа бит – тарих.

ЗӨМБӨРҘӘК

Тау битенән ағып сыға

Һалҡын шишмә - Зөмбөрҙәк.

Сөптөр-сөптөр юрмалауы -

Үҙе бер йыр, мең биҙәк.

Эргәһендә ҡотоғо бар -

Кәртәләнгән-ҡаймалы.

Һирпеп алып һыуҙар эсә

Унан башҡорт байманы...

Бала саҡтың бер инеше -

Бәләкәй генә йылғам.

Тауыҡ кисмәле һыуына

Бар бала сағым һыйған.

Зөмбөр-зөмбөр, зымбыр-зымбыр -

Улағы юҡ - ҡайҙалыр.

Әллә күккә олғашҡан да

Көмөш мөгөҙ-айҙамы?

Төймәгә баҫып сығарған

Ҡәҙер-баһа юҡ һыуға.

Теш зәңкетер Зөмбөрҙәгем!

Күңел һине юҡһына...

Айһылыу Ғарифуллина

Автор:Айсылу Гарифуллина
Читайте нас в