Ҡышҡы Шүлгәнташ хайран иткән

Үткәндә, февраль ҡатыш март бурандары ажғырып, "ныҡлап яҙ килмәҫ элек яуып ҡалайым", тигән кеүек, ҡары уҡмашып-уҡмашып өҙлөкһөҙ яуып торған бер көнө беҙ,Килдеғол мәктәбенең уҡытыусы ҡатын-ҡыҙҙары, үҙебеҙҙең йәнтөйәгебеҙ Мәккәһе Шүлгәнташҡа барып ҡайттыҡ.

Иң тәүҙә шул һөйөндөрҙө – Шүлгәнташта - тыныслыҡ, йәйгеһенге һымаҡ ығы-зығылыҡ юҡ, әйтерһең дә, мөғжизәле был донъялыҡта тик беҙ - туғыҙыбыҙ ғына ла, унан беҙҙе ҡаршылаусы һәм оҙатыусылар: музей менән таныштырыусы һәм мәмерйәгә алып инеүселәр генә.

 Музей - иҫ киткес, заманса төҙөлгән моһабәт һарай-дворец эсендәге экспонаттар, стеналағы һүрәттәр аша үҙең дә һиҙмәҫтән, алыҫ тарихи үткәндәргә, боронғолоҡҡа инеп юлығаһың. Эксурсоводҡа ҙур рәхмәт, мәмерйәнең тарихы буйынса беҙгә ысын мәғәнәһендә мастер-класс күрһәтте, күп тарихҡа күҙебеҙҙе асты.
Экскурсиябыҙҙың икенсе өлөшө -данлыҡлы мәмерйәбеҙгә барыу һәм инеү ине. Шығыр-шығыр ҡарлы юлдан, күңелле һөйләшә-көлөшә саҡырымдай араны йәйәүләп үткәнебеҙҙе һиҙмәй ҙә ҡалдыҡ.
Ҡышҡы мәмерйәлә үҙенсәлекле һиллек, матурлыҡ һәм әкиәти серлелек. Мәмерйәнән рухи яңырып, сафланып сыҡҡандай тойҙоҡ үҙебеҙҙе.
Ҡояшһыҙ, ҡарлы-буранлы көнөбөҙ кәйефебеҙҙе саҡ ҡына ла ҡырманы, киреһенсә, ишеткән-күргәндәребеҙҙән иҫ киткес тәъҫораттар алып, ҡыуанышып, шау-гөр килеп, сәйәхәттән күңелле йөрөп ҡайттыҡ, - тип хәбәр итә уҡытыусы Иркә Уразбай ҡыҙы Фәйзуллина.