Ҡолғанала йәшәүсе йәш ғаилә – Сәйәх Сәлих улы менән Мәһәҙей һылыуы Әлиә Азамат ҡыҙы Ғәйетбаевтарға бәхет - бер-береһен аңлашып, береһенән-береһе бәләкәс балаларын тупылдатып һөйөп йәшәүҙә, тормоштан йәм табыуҙа.
Йәш ғаиләнең хужабикә исемендә магазины бар. Йәнәрғоштоң осона 16х8 итеп ҙурҙан өй һалып сыҡҡандар. Эшкә сос Сәйәх: “Әсәйем менән фермабыҙ ҙа, эш тә уртаҡ. Йәшәр кәрәк бит – тырышабыҙ, дөйөм эштә болғанабыҙ”, - тип ҡыҫҡаса ғына ҡылыҡһырлама бирҙе йәшәйеш-тороштарына.
Әлиәнең әлегә әсәлек бурыстары алға ҡалҡҡан мәл – 6 йәшлек Сибәғәтте, 4 йәшлек Вилиәне тәрбиәләйһе, 6 айлыҡ Булатты ҡарайһы, донъя көтәм тип сабып йөрөгән иренә терәк-таяныс булып, усаҡ ҡотон һаҡлайһы бар.
Эйе, ауыл йәме – ғаиләләр шул. Ә Ғәйетбаевтарҙыҡы кеүек йәш ғаиләләрҙең ауылда төпләнеп, ошонда эшен, ашын табыуға ынтылып, тырышып тороуы – икеләтә бәхет.