РАЙОНДА ЭПИДЕМИОЛОГИК ХӘЛ НИСЕК?

Районда коронавирус пандемияһына бәйле хәлдәр нисек? Сир артамы, кәмейме? Әле нисә кеше ковид-госпиталдә ята?

Яңы коронавирус инфекцияһын иҫкәртеү мәсьәләләренә арналған сираттағы брифингта район үҙәк дауаханаһының табип-эпидемиологы Юрий Николаевич Коробчанский ошо һорауҙарға яуап бирҙе һәм түбәндәге мәғлүмәттәрҙе еткерҙе.

Ағымдағы йылдың 1  ғинуарынан районда коронавирус менән 1694 кеше ауырыған. Сирҙең иң аҙған мәле сентябргә тура килә - 537 кешелә ковид раҫланған. Октябрҙә 437 кеше сирләгән. Ноябрҙең тәүге 11 көнөндә 30 осраҡ булған. Шул иҫәптән үткән аҙнала 23 осраҡ теркәлгән. Был аҙнаның тәүге 3 көнөндә 7 кеше сирләгән. Ғөмүмән, һуңғы 3 аҙнала сирҙең кәмеү тенденцияһы күҙәтелә.

Сирләүселәрҙең йәш нисбәте түбәндәгесә: балалар – 22, өлкәндәр – 18, эшкә яраҡлы контингент – 60 процент.

Вакцина яһатҡандар араһынан 65 кеше сирләгән. 18 кеше был ауырыуҙы икенсе тапҡыр үткәргән. Әлеге ваҡытта 16 кеше ковид-госпиталдә, 161 кеше амбулатор шарттарҙа дауалана.

1 июндән алып 21 кеше ошо мәкерле сир ҡорбаны булған.

Әлеге көнгә районда 4576 кеше вакцина яһатҡан, был планға ҡарата 51 процент.

Һуңғы ваҡытта ОРВИ һәм грипп менән ауырыусылар арта төшкән.