Юбилей миҙалдары тапшырылды

Район мәҙәниәт һарайында Германиялағы совет ғәскәрҙәре төркөмөн булдырыуға 75 йыл тулыу айҡанлы митинг үтте. Унда сираттағы бер төркөм райондаштарға «Германиялағы совет ғәскәрҙәре төркөмө ветерандары союзы» ойошмаһының иҫтәлекле миҙалдары тапшырылды.

Германиялағы совет ғәскәрҙәре төркөмө 1945 йылдың июнь айында ойошторола һәм 1994 йылға тиклем иң ҙур ғәскәри берекмә булып һанала.

Был сарала район хакимиәте башлығының беренсе урынбаҫары вазифаһын башҡарыусы М. Ғүмәров сығыш яһап:
- Германияла лайыҡлы хеҙмәт итеп, башҡорттоң, ғөмүмән, Рәсәй халҡының ниндәй сыҙамлы, көслө, батыр шәхес булыуҙарын танытып ҡайттығыҙ. Үҙегеҙҙең исемегеҙгә тап төшөрмәй, бөгөнгө көндә йәшәйешегеҙ, эшегеҙ менән киләсәк быуынға өлгө булып тораһығыҙ, - тине.

Мөхтәр Сәғитов музейы етәксеһе вазифаһын ваҡытлыса башҡарыусы Л. Ғайсина район мәҙәниәт һарайы фойеһында асылған “Генерал-майор Шайморатов” исемле экспозиция хаҡында бәйән итте.

Өс планшетта 112-се Башҡорт атлы дивизияһының беренсе командиры - легендар комдивтың фотолары, шулай уҡ орден һәм миҙалдарының күсермәһе урынлашҡан. Комплекс телевизор һәм герой тураһында 3 фильм һаҡланған флеш-карта менән йыһазландырылған.

БР яугир-интернацио-налистары, Германиялағы Совет ғәскәрҙәре төркөмө ветерандары, төбәк йәмәғәт ойошмаһы ағзаһы Х. Ҡыуандыҡов ойошманың төп маҡсаты хаҡында иҫкә төшөрөп:
- Ярҙам кәрәк булғанда, бер-беребеҙгә терәк булып, ярҙамлашып, балаларыбыҙға матур тәрбиә биреп йәшәргә, уйланылған эштәребеҙҙе, маҡсаттарыбыҙҙы бергәләп атҡарып сығырға яҙһын, - тине.

Сарала ҡатнашыусылар М. Шайморатов экспозицияһы эргәһендә күмәкләп фотоға төштөләр. Артабан М. Сәғитов музейына экскурсия ҡылдылар, мәктәп алдындағы һәйкәлгә сәскә һалдылар.