Ирхан Рәсәй кимәлендә еңеү яулаған!

Егет кешегә етмеш төрлө һөнәр ҙә аҙ, тиҙәр бит.

Әбделмәмбәт мәктәбе уҡыусыһы, мәктәптең «Тимербатыр» робототехника түңәрәге шөғөлләнеүсеһе Ирхан Үтәбаев (һүрәттә - һулдан икенсе) бының тап шулай икәнен раҫлай килә. Ул уҡыу алдынғыһы, спорт менән дә шөғөлләнә. Күптән түгел Ирхан «АгроНТИ 2020» Бөтә Рәсәй конкурсының финалында ҡатнашып, «Агророботтар» төрөндә еңеүсе булған. Финал уйындары, пандемия сәбәпле, һәр төбәктә, видеояҙмаға төшөрөлөп, ҡаты талаптар менән үткәрелгән.

Бер аҙна буйы Ҡазанда жюри төбәктәрҙән килгән видеояҙмаларҙы тикшереп, еңеүсене билдәләгән. Бөтә Рәсәй буйынса 18 мең уҡыусы ҡатнашыуын иҫәпкә алғанда, Ирхан Инсур улының был еңеүе бик мәртәбәле. Шулай уҡ ул максималь мөмкинлектән барлыҡ мәрәйҙәрҙе йыйып, абсолют рекорд та ҡуйған.

Афарин, Ирхан! Киләсәктә лә уңыштар насип булһын!