АУЫЛ УҠЫТЫУСЫЛАРЫ ГРАНТЛЫ БУЛДЫ!

Уҡытыусылар көнөндә республика Башлығы Радий Хәбиров ауыл ерендә эшләүсе йәш педагогтарға гранттар тапшырҙы.

Хәтерегеҙгә төшөрәбеҙ, 2019 йылдың июлендә республика етәксеһе йәш, перспективалы ауыл уҡытыусыларын дәртләндереү маҡсатында 600 мең һумлыҡ йыл һайын бирелә торған 100 грант булдырғайны. Быйыл гранттарҙың һаны 150-гә еткерелгән. Суммаһы ла артҡан – хәҙер ул 690 мең һум.
Был гранттарға ауыл ерендә эшләүсе 35 йәшкә тиклемге һәр йәш уҡытыусы дәғүә итә ала. Кәмендә ике йыл эш стажы булыу шарт. Быйыл райондан 7 йәш уҡытыусы конкурста ҡатнашыу өсөн документтарын ебәргән һәм шуларҙың 3-әүһе грантҡа лайыҡ тип табылған.
Әбделмәмбәт мәктәбенең математика һәм физика уҡытыусыһы Сәйфетдинов Артур Зәйнетдин улы республика Башылғы ҡулынан грант сертификатын алып ҡайтты.
Артур Зәйнетдин улынан тәьҫораттары хаҡында ла һораштыҡ.
- Был грантҡа үтеүемә бик шатмын. Ул киләсәктә тағы ла дәртләнеберәк эшләргә этәргес бирә. Ә грант аҡсаһын өйөбөҙгә төкәтмә төкөтөп, киңәйтеү өсөн тотонмаҡсымын. Сөнки ғаиләбеҙҙә 3 бала үҫә, уларға уңайлыҡтар булдырыу шарт.
Былтырҙан алып Әбделмәмбәт мәктәбендә эшләйем. Уға тиклем Килдеғол мәктәбе етәксеһе булдым. Мәктәп системаһында эшләүемә туғыҙынсы йыл, - тине Артур Сәйфетдинов.