Мөләйемлеге, ихласлығы менән клиенттарының ихтирамын яулаған почтальон Гөлгөнә Мөфтәхетдинова Иҫке Собханғол почта бүлексәһенең 6-сы участкаһын - М. Ғафури, Ҡыҙылташ, Совхоз, Ерекле, Шишмә, Ҡайынтүш, М. Сәғитов урамдарын, М. Ҡәҙерғолов, Тыныслыҡ тыҡрыҡтарын хеҙмәтләндерә. Участкала йәмғеһе 304 өй.
Гөлгөнә Сәлих ҡыҙы почта хеҙмәтендә 21 йыл эшләй. Участкаһындағы һәр кешене - яҡындан, кемдең ниндәй баҫмаларға нисә айға яҙылғанына тиклем яттан белгән хеҙмәткәр хаҡында коллегалары ла яҡшы фекерҙә.
- Бик итәғәтле, ипле, яуаплы хеҙмәткәр. Айырыуса подписка осоронда ҙур яуаплылыҡ күрһәтә - өйҙәргә генә түгел, ойошмаларға ла йөрөп яҙҙырып сыға һәм һәр ваҡыт планын теүәл үтәй. Әле, мәҫәлән, 2019 йылдың тәүге ярты йыллығына план буйынса 195 баҫма ҡаралһа, Гөлгөнә Сәлих ҡыҙы 160-ына яҙҙыртып та ҡуйған. Ваҡ посылкаларҙы ла ваҡытында илтеп бирә, - ти Иҫке Собханғол почта бүлексәһе начальнигы Нәркәс Баймырҙина, почтальондың эшенә баһа биреп.
М. Мырҙағолова.