Радий Хәбиров - Урал аръяғында

Әбйәлил районында Радий Фәрит улы Рәхмәт ауылының урта мәктәбен ҡараны, Мораҡай ауыл фельдшер-акушерлыҡ пункты һәм Байым участка дауаханаһы менән танышты, Күсем руднигы ауылында мәктәп автобусы водителе менән аралашты, Дәүләт ауылындағы мәҙәни-ял үҙәге бинаһының торошо менән ҡыҙыҡһынды, Асҡарҙың «Көнсығыш 1» биҫтәһендә булды. Хеҙмәт ветераны Наилә Хажиәхмәтова Радий Фәрит улын сәйгә ҡунаҡҡа саҡырып, райондағы мәсьәләләр, проблемалар хаҡында фекер алыштылар.
Баймаҡ районында ул ветерандар, район дауаханаһының балалар бүлексәһе хеҙмәткәрҙәре менән осрашты, Темәс ауылы халҡы менән аралашты, биләмәләге карьерҙарҙы ҡараны, “Талҡаҫ” шифаханаһы, «Экопродукт» ЯСЙ-һы, “Колибри” ЯСЙ-һының тегеү цехы эшмәкәрлеге менән танышты, “Башҡорт деликатестары” ит комбинатын ҡараны.
Хәйбулла районында Радий Хәбиров Аҡъяр үҙәк дауаханаһына барҙы, район мәҙәниәт йорто алдында халыҡ менән осрашты, китапханаға инеп сыҡты.
Ейәнсура районында иһә һарыҡсылыҡ менән шөғөлләнеүсе “Маяҡ” АХК-һының эшен ҡараны, район үҙәге Иҫәнғол ауылында Дуҫлыҡ паркын ҡараны, социаль приютҡа инеп, тәрбиәләнеүселәр менән аралашты һәм “Башҡортостандың әҙәби мәктәбе” конкурсында еңеү яулаған 6-сы синыф уҡыусыһы Айгүзәл Аҙнабаеваны үҙ кабинетына саҡырҙы.
Радий Хәбиров һәр районда халыҡ менән аралашып, урындағы проблемалар менән танышты һәм уларҙы хәл итеү юлдарын эҙләргә һүҙ бирҙе.
- Беҙ барыбыҙ ҙа ғәҙел йәшәһен өсөн тырышасаҡмын. Бының өсөн көсөм, энергиям һәм тәжрибәм бар. Мин Башҡортостанға халҡымды яратҡан өсөн ҡайттым. Мин һеҙгә ярҙам итер өсөн килдем, - тине ул.

М. Мырҙағолова әҙерләне.