Ике тырыш – мең ырыҫ

Ун һигеҙ йыл мәктәптә хужалыҡ мөдире булғандан һуң ауылда почтальон йөгөн тартыусы Әсҡәттең эшенән ҡәнәғәт ауылдаштары – аҙнаһына икене үҙ машинаһы менән район үҙәгенә барып гәзит-журналдар, тауар алып ҡайта.
Хәләле Зилә лә бик бөтмөр: донъяһын ихлас көтә, ҡәйнәһе баҡыйлыҡҡа күскәс, яңғыҙ ҡалған 89 йәшлек ҡайныһын да һәйбәт ҡарай. Ике йыл дүрт ай түшәктә ятҡан мәрхүмә ҡәйнәһен дә бик матур итеп ҡараған ул. “Ҡәйнәм ҡайным менән бергә йәшәүҙәренә 70 йыл тула тигәндә генә мәрхүмә булды”, - ти килен булып төшкәндән алып балалар баҡсаһында төрлө эштәрҙә эшләп, унан ашнаҡсы булып хаҡлы ялға сыҡҡан Зилә.
Нигеҙҙә, мал көсө менән йәшәһәләр ҙә, дүрт ҡыҙҙарын да уҡытҡандар Мәхмүтовтар. Зиниралары Ғафури районында йәшәй, ире менән биш бала тәрбиәләйҙәр. Үҙе БДУ-ның Стәрлетамаҡ филиалында ситтән тороп уҡып йөрөй. Темәстә йәшәүсе Зөлхизәләре Сибай сәнғәт колледжын тамамлаған, думбырасы. Темәс сәнғәт мәктәбендә уҡыта. Яңы Усманда төпләнгән Зилиәләре Өфө яғыулыҡ-энергетика колледжын ҡыҙыл дипломға бөткән. Ғәҙилә әле студент – Өфөлә дизайнер, тармаҡтар буйынса менеджер һөнәрен үҙләштерә. Дүрт ҡыҙҙан һуң көтөп алынған малай Искәндәр ауыл мәктәбендә 9-сы класта уҡый.
Әлбиттә, студенттарҙы уҡытыу ҙа еңел түгел. Ошоно аңлаған мәхмүтовтар өс баш һыйырҙан, йылҡы малынан өҙөлмәй. Әле лә, дүрт баш йылҡы ҡайтып инергә тейеш, тип малдарының һау йөрөүенә өмөт бағлап ҡына торалар. Һарыҡтарын да 20 баштан кәметмәйҙәр – йәй бесәнгә ҡайтҡан балаларына, ейән-ейәнсәрҙәренә ит кәрәк бит.
Йәшелсә, картуфтан да мул уңыш алғандар. Сөгөлдөр-кишерҙәре тау-тау булып ята. Тормош ҡороуҙарына 30 йыл тулыуҙы бала-сағалары менән матур итеп билдәләгәндәр. “Күршеләрем бик һәйбәт: һәр байрамда, ҡунаҡ-төшөмдә бергә булабыҙ, эште лә бергәләп эшләйбеҙ – Аллаһҡа мең шөкөр”, - тип ут күршеләренән бик риза икән Зилә тимәк, үҙе лә яҡшы күрше. Татыулыҡта көн итеүгә ни етә һуң?! Ошонан артыҡ бәхет бармы?

А. Ғарифуллина.