Бөтә яңылыҡтар
Йәмғиәт
5 Сентябрь 2018, 11:09

Саксония вәкилдәре - Бөрйәндә

Башҡортостанға Саксония ирекле дәүләте Ландтагының рәсми делегацияһы килде. Бөрйән ере ҡунаҡтарҙа ниндәй тәьҫораттар уятҡан? Һүҙ – Саксония вәкилдәренә.

Башҡортостанға Саксония ирекле дәүләте Ландтагының рәсми делегацияһы килде. Сәфәр Башҡортостан һәм Саксония араһында парламент-ара хеҙмәттәшлек сиктәрендә ойошторолдо. 25 кешенән торған рәсми делегация республика Башлығы Рөстәм Хәмитов, БР Дәүләт Йыйылышы – Ҡоролтай рәйесе Константин Толкачев, министрлыҡтар, дәүләт комитеттары вәкилдәре менән осрашты, Башҡорт дәүләт аграр университетын ҡараны. Ҡунаҡтар Башҡортостан биләмәһендә киң спектрҙағы тауарҙар етештереү буйынса уртаҡ предприятиелар ойоштороу мөмкинлеге менән ҡыҙыҡһынды, Өфө-Дрезден тура рейсын ойоштороу һәм студенттар менән алмашыу, ҡалдыҡтарҙы сорттарға бүлеүҙә, эшкәртеүҙә һәм утилләштереүҙә немец технологияларын ҡулланыу мәсьәләләрен ҡараны, аграр университет студенттарын Саксония фермерҙарына практикаға саҡырҙы.

Өфө ҡалаһынан тыш, делегаттар шулай уҡ Өфө, Белорет, Бөрйән райондарында ла булды. Беҙҙең районда улар Шүлгән мәмерйәһен ҡараны, боронғо һүрәттәр менән ҡыҙыҡһынды, солоҡтарҙан бал алыу процесын күҙәтте.

Бөрйән ере ҡунаҡтарҙа ниндәй тәьҫораттар уятҡан? Һүҙ – Саксония вәкилдәренә.



Себастиан Фридер Фишер, делегация етәксеһе, Саксония Ландтагы ағзаһы:

- Рәсәй - бик ҡыҙыҡлы ил. Мин һеҙҙең легендаларға, һеҙҙең матур тәбиғәткә һәм балығыҙға ғашиҡ булдым. Һеҙҙең бал мине айырыуса ҡыҙыҡһындыра, сөнки мин Германияла шеф-ашнаҡсы ла булып эшләйем. Балығыҙ - биологик яҡтан таҙа продукт, үҙе бик тәмле, әҙерләнеше лә ҡыҙыҡ.

Йорг Кизеветтер, Саксония Ландтагы ағзаһы:

- Башҡортостанда беренсе тапҡыр ғына түгелмен. Өфөлә, Стәрлетамаҡта булғаным бар, тик һеҙҙең төбәктә булғаным юҡ ине әле. Бында миңә бик оҡшай, мин дә, башҡа коллегаларым кеүек, һеҙҙең тәбиғәткә сикһеҙ һоҡланам. Минең уйымса, һеҙҙең районда туристик потенциал бик ҙур һәм киләсәктә был өлкәлә хеҙмәттәшлек булырға мөмкин.

Андреас Новак, Саксония Ландтагы ағзаһы:
- Мин Рәсәйгә 4-се тапҡыр килдем, Башҡортостанда икенсе тапҡырмын. Миңә ҡунаҡсыллыҡ һәм һеҙҙең граждандарҙың Германия менән хеҙмәттәшлек итергә ҡыҙыҡһыныуы бик тәьҫир итте. Әлегә беҙҙең өсөн ябай булмаған, хатта ҡатмарлы, ваҡыттар бара. Был визит ошо ҡатмарлы ваҡыттарҙа тура бәйләнештәр булдырырға ярҙам итер, ҡасандыр санкциялар юҡҡа сығарылыр һәм тағы ла әүҙемерәк эшләргә мөмкинлек булыр, тип өмөтләнәм. Нәҡ ошо беҙҙең маҡсат булып тора ла инде. Һәм мин күрәм: Рәсәй, атап әйткәндә, Башҡортостан яғы, бының менән бик ҡыҙыҡһына.

Айырыуса балдың етештерелеүен ҡарау бик ҡыҙыҡлы булды, сөнки минең һайлау участкамда ла ҙур умарталыҡ бар. Беҙҙә лә бал насар түгел ул, әммә башҡорт балы иҫ китмәле! Минең уйлауымса, нәҡ ошо беҙҙең илдәр араһындағы хеҙмәттәшлек өсөн һәйбәт күпер буласаҡ.

Рәсүл Ғосманов, делегацияны оҙатып йөрөүсе, БР Дәүләт Йыйылышы – Ҡоролтайҙың аграр мәсьәләләр, экология һәм тәбиғәтте файҙаланыу буйынса комитеты рәйесе:
- Парламент-ара бәйләнештәр беҙгә илдәребеҙ араһындағы хеҙмәттәшлекте нығытыуға, инвестициялар йәлеп итергә, вуз-ара йоғонтоно нығытыуға булышлыҡ итә. Саксония Ландтагы вәкилдәре менән беҙ Башҡортостандың иң матур урындарында йөрөйбөҙ һәм бөгөн, Бөрйәнде күреп, дуҫтарыбыҙҙың райондың матурлығына һушы китте. Күҙаллауымса, перспективала Германиянан туристар ағымы артасаҡ һәм хеҙмәттәшлекте нығытыу, туризмды, ауыл хужалығын, ҡортсолоҡто үҫтереү маҡсатында яңынан Бөрйән районына әйләнеп киләсәкбеҙ.

М. Мырҙағолова.