Яугир уҡытыусы менән осрашыу

-Ҡурғашлы мәктәбендә МХО-ла ҡатнашҡан, һөнәре буйынса физкультура уҡытыусыһы, ҡыҫҡа ваҡытлы ялға ҡайтыусы яугир менән “түңәрәк өҫтәл” артында осрашыу үтте. Хәрби кеше тап ошо мәктәптә уҡыуы, ары уҡытыусы һөнәренә эйә булыуы, спорт һөйөүе, әрме сафына барғандан һуң хәрби кеше булып китеүе, махсус хәрби операция, Рәсәй һалдаттарының батырлығы, әрме хеҙмәте, Ватанға һөйөү, илебеҙ именлеге, хәрби бурысты үтәү, яраланған осраҡта беренсе ярҙам ойоштороу, шулай уҡ башҡорт телен, география, инглиз теле фәндәрен яҡшы белеү күп осраҡта ярҙам итеүе тураһында һөйләп үтте.

Балалар ауылдашыбыҙҙы ҡыҙыҡһынып тыңлап, етди һорауҙар ҙа бирҙеләр. Осрашыуҙа тылдан һалдаттарға килгән ярҙам тураһында ла әңгәмә булды. Ауылыбыҙҙан МХО-ла 7 яугир ҡатнаша. Батырҙарса һәләк булған Ҡарағолов Хәкимйән менән Шәрәфетдинов Русланды балалар бер минутлыҡ тын ҡалып иҫкә алды.

Осрашыу тулҡынландырғыс булды. Нәҡ ошондай осрашыуҙар тыуған ил өсөн ғорурлыҡ тойғоһо тәрбиәләй. Уҡыусылар ауылдаштары өлгөһөндә ысын геройҙарҙың эргәлә булыуын белде, илһөйәрлектең ниндәй юғары әһәмиәткә эйә булыуын аңланы.

Хөрмәтле яугир! Беҙ һиңә оло рәхмәтебеҙҙе еткерәбеҙ. Һинең менән, шулай уҡ СВО-ла ҡатнашыусы ауылдаштарыбыҙ менән ғорурланабыҙ! Ныҡлы һаулыҡ, ғаилә именлеге, тыныс аяҙ күк йөҙө теләйбеҙ! Шулай уҡ, яугир уҡытыусыбыҙҙы, яҡынлашып килгән Уҡытыусылар көнө менән дә ихлас йөрәктән ҡотлайбыҙ! – тип хәбәр итәләр
МОБУ НШ-ДС д.Кургашлы  төркөмөндә.