Бөрйән ере яугир егет менән хушлашты

Ҡаһарман яҡташыбыҙҙы һуңғы юлға оҙатыуға арналған матәм сараһында Башҡортостан Хөкүмәтенән килгән вәкил, М. Аҡмулла исемендәге башҡорт дәүләт педагогия университеты уҡытыусыһы З. Әлибаев, район хакимиәте башлығы Ғ. Манапов, Белорет, Межгорье ҡалалары, Белорет һәм Бөрйән райондары хәрби комиссары Ғ. Хөснуллин ҡатнашты. Улар һалдаттың яҡындарының һәм туғандарының тәрән ҡайғыһын уртаҡлашты.

Туғандары исеменән Әлфирә Сөләймәнова һәм Зилә Зәкироваға һүҙ бирелде. Улар 25 йәше лә тулып өлгөрмәгән Илнурҙы татыу, берҙәм ғаиләлә үҫкән киң күңелле, алсаҡ, асыҡ йөҙлө, ярҙамсыл, батыр егет тип иҫкә алдылар.

Илнур Иршат улы 1998 йылдың 27 сентябрендә Иҫке Собханғол ауылында донъяға килгән. 2005-2014 йылдарҙа Иҫке Собханғол урта мәктәбен тамамлағандан һуң Урал аръяғы агросәнәғәт колледжының Иҫке Собханғолдағы филиалында белем ала. Уҡыған ваҡытта мәктәптең һәм училищеның йәмәғәт тормошонда, спорт ярыштарында әүҙем ҡатнаша. Үҙен маҡсатлы, дисциплиналы егет тип таныта. Гер күтәреү буйынса спорт төрө менән шөғөлләнә. 2017-2018 йылдарҙа тыуған ил алдындағы бурысын Елань горнизонында һәм Ырымбур өлкәһенең Тоцк ҡалаһында намыҫлы үтәп ҡайта. Әрме хеҙмәтенән ҡайтҡас, вахта ысулы менән эшләй.

Илнур Сәғитов Рәсәй Президенты тарафынан ҡабул ителгән указға ярашлы, өлөшләтә мобилизация сиктәрендә 2022 йылдың 28 сентябрендә хәрби хеҙмәткә алына. Ул тыуған илебеҙҙе нацизмдан яҡлап, Ватаныбыҙ именлеге һәм беҙҙең тыныс, бәхетле тормош хаҡына үҙенең хәрби бурысын бөгөнгө көнгә тиклем намыҫлы һәм лайыҡлы үтәне.

Һәр кем өсөн яҡын кешеңде юғалтыуҙан да ауыр ҡайғы юҡ. Яугир яҡташыбыҙҙың ата-әсәһе, яҡындары һәм туғандары алдында оло хөрмәт менән баш эйәбеҙ, уның тураһындағы яҡты иҫтәлек беҙҙең йөрәктәрҙә мәңге һаҡланыр.