Балалар өсөн уйын майҙансығы асылды

Ҡурғашлы халҡының ҡыуанысын бүлешергә район хакимиәте башлығы Рәмил Абдуллин, уның беренсе урынбаҫары Венера Вәлиева, район хакимиәтенең муниципаль хеҙмәт, кадрҙар һәм мәғлүмәт-аналитика бүлеге начальнигы Марсель Ғүмәров барҙы. Сарала шулай уҡ Байназар ауыл хакимиәте башлығы Нуриман Әминев, Ҡурғашлы ауылы активистары, ауыл халҡы, балалар ҡатнашты.
Район хакимиәте башлығы урындағы инициативаларға булышлыҡ итеү программаһының әһәмиәтле булыуы тураһында һөйләп, ҡурғашлыларға тәбрик һүҙҙәрен еткерҙе.
-Ауыл халҡын, берҙәм булып, балаларҙың хыялын тормошҡа ашырып, проектты уңышлы башҡарып сығыуҙары менән ихлас ҡотлайым. Был эшкә үҙ өлөшөн индергән һәр кемгә оло рәхмәтемде белдерәм. Спорт һәм уйын майҙансығы әүҙем ял итергә мөмкинлек биреп, халыҡҡа оҙаҡ хеҙмәт итһен, - тине Рәмил Миңлеәхмәт улы һәм Ҡурғашлы ауылының 90 йыллыҡ юбилейы алдынан һәм балалар майҙансығы асылыу уңайынан ауыл халҡына спорт инвентарҙары алыу өсөн сертификат бүләк итте, майҙансыҡты төҙөүҙә әүҙем ҡатнашҡандарға район Советының рәхмәт хаттарын тапшырҙы.
Ауылдаштарын ҡыуаныслы ваҡиға менән ауыл старостаһы Әсғәт Хәйбуллин, ауыл советы депутаты Хәлит Мырҙағолов, ҡатын-ҡыҙҙар советы ағзаһы Әнисә Сәфәрова, имам-хатиб Илфар Әлибаев ҡотлап, ошо эште атҡарып сығыуҙа ярҙам иткән барлыҡ ир-егеттәргә, ҡатын-ҡыҙҙарға, район хакимиәтенә рәхмәт һүҙҙәрен еткерҙеләр, майҙансыҡтың балаларҙы ҡыуандырып оҙаҡ хеҙмәт итеүен теләнеләр.
Артабан һүҙ Байназар ауыл хакимиәте башлығы Н. Әминевҡа бирелде.
-Һеҙҙең тырышлығығыҙ, әүҙемлегегеҙ, берҙәмлегегеҙ менән ошо уңышҡа өлгәштек. Киләсәктә лә шулай эшләргә яҙһын. Артабан волейбол, футбол майҙансыҡтары булдырырға уйығыҙ бар. Уларҙы ла берҙәм генә атҡарып сығырбыҙ, уйын майҙансығы балалар өсөн төрлө саралар үткәреү үҙәгенә әйләнер тип өмөт итәм, - тине Нуриман Нуритдин улы һәм майҙансыҡты төҙөүҙә әүҙем ҡатнашҡан кешеләргә рәхмәт хаттары тапшырҙы.
Артабан ауыл халҡын муниципаль хеҙмәт ветераны, проектты яҡлауға тос өлөшөн индереүсе Хәнифә Вәлиева ҡотланы һәм балалар баҡсаһына бүләк тапшырҙы.
Ауылдаштары исеменән рәхмәт һүҙен үҙе яҙған шиғыры менән Фәйләрә Хәйбуллина ла еткерҙе.

Уйын майҙансығы балаларға бик оҡшаны. Таҫмаларҙы киҫеү менән уйнарға тотондолар. Ҡунаҡҡа килгән ҡурсаҡ айыу ҙа уларҙың күңелдәрен күтәрҙе.
-Майҙансыҡ буласаҡ тигәнде ишеткәс тә уны көтә башланыҡ. Рәхмәт уны төҙөүселәргә, - тине 4-се класс уҡыусыһы Заһит Ҡарағолов.
2-се класта тик “5”-ле билдәләренә генә уҡыған Айгөл Иҫәнбаева ла уйын майҙансығына бик ҡыуанған.
-Киләм дә иң беренсе әүһәлдәктә эйәм, шунан тауҙан шыуам. Уйнарға гел ошонда йөрөйәсәкмен, - ти ул.
“Урындағы башланғыстарҙы хуплау” программаһы Башҡортостан Республикаһында 2014 йылда башланды һәм 2030 йылға тиклем республиканы үҫтереү стратегияһының төп бурыстары иҫәбенә инә.
Программаның төп маҡсаты – республика бюджеты субсидиялары иҫәбенә төҙөкләндереү һәм йәмәғәт инфраструктураһын үҫтереү буйынса мөһим мәсьәләләрҙе хәл итеү.
Программаны бойомға ашырыу бер нисә этаптан: халыҡ йыйылышынан, заявка төҙөүҙән, уны тикшереү һәм конкурслы һайлап алыуҙан тора. Конкурсты үткән осраҡта, урындағы етәкселек вәкилдәре инициатива төркөмө менән берлектә подрядсы ойошмаларҙы һайлай һәм проектҡа ярашлы ҡуйылған бурыстарҙы хәл итә. Республикала программала ҡатнашырға теләүселәр һаны йылдан-йыл арта. Сөнки был программа – йылдар буйы ҡул етмәгән проблемаларҙы хәл итеүҙең бер юлы. Был проекттың үҙенсәлеге лә шунда: ниндәйҙер проблеманы хәл итеүҙә халыҡ үҙе башлап инициатива күрһәтә һәм урындағы хакимиәт менән тығыҙ бәйләнештә эшләй.