Бөтә яңылыҡтар
Матбуғат
7 Декабрь 2017, 13:41

Әҙәм башын һүҙ борор

Бөгөн рухыбыҙҙы ҡеүәтләр, башҡортлоғобоҙҙо иҫбатлар, көсөбөҙҙө күрһәтер бер генә юҫыҡ бар – үҙ телебеҙҙәге гәзит-журналдарға яҙылыу, туған матбуғатҡа яҙылыу аша телде һаҡлау.

Ағас башын ел борор, әҙәм башын һүҙ борор, тип бик хаҡ әйткән халҡыбыҙ: бөгөнгө көндә донъя мәғлүмәткә эйә кешеләр ҡулында. Райондың берҙән-бер мәғлүмәт сығанағы булған “Таң”ыбыҙҙы бөгөн кеше аңын баҫҡан мәғлүмәт диңгеҙен тулыландырыр сығанаҡ, изге Йәншишмә тип әйтмәү яҙыҡ булыр.
Эйе, бөгөнгө баҙар мөнәсәбәте шарттарында беҙҙең кеүек бәләкәй гәзиттәр (ҙур эш башҡарһа ла) баҙап ҡалды – йәшәр өсөн аҡса табыу, рекламасыларҙы йәлеп итеү шарт. Баҙар һеперткеһе бөтәһен бер ыңғай һеперә: һин үҙәккә яҡынмы-юҡмы, һин йәшәгән ерҙә эре сәнәғәт предприятиелары бармы-юҡмы, халыҡ аҡсалымы-юҡмы – барыбер. Закон-ҡарар – бөтәһе өсөн бер тигеҙ. Ошондай мәлдә беҙҙең берҙән-бер “ҡотҡарыу түңәрәге” – халҡыбыҙҙың аңлы ҡарашы, ғәмәлдәге эше, гәзиткә яҙылыуы. Бөгөн телебеҙҙе, рухыбыҙҙы митингыға сығып, яу сабып яҡлар-һаҡлар мәл түгел. Прибалтика илдәре халҡы үҙҙәренең гәзит-журналдарын һаҡлап алып ҡалыу өсөн бер үк баҫмаға 5-6-шар дана яҙылған,татар дуҫтар ҙа был тапҡырҙа әүҙем. Бөгөн рухыбыҙҙы ҡеүәтләр, башҡортлоғобоҙҙо иҫбатлар, көсөбөҙҙө күрһәтер бер генә юҫыҡ бар – үҙ телебеҙҙәге гәзит-журналдарға яҙылыу, туған матбуғатҡа яҙылыу аша телде һаҡлау.
Район хакимиәте башлығы А.Әлибаков район почта бүлексәләре етәкселәре менән үткәргән кәңәшмәлә лә ошо проблемаларға баҫым яһаны.
Кәңәшмәгә килгән почта бүлексәләре етәкселәре үҙҙәренең эше, подписка барышы, проблемалар хаҡында һөйләне.
В. Усманова, Әбделмәмбәт почта бүлексәһе етәксеһе:
- Беҙҙә 3 хеҙмәткәр эшләй һәм 3 ауылды хеҙмәтләндерәбеҙ. Ултырған бинабыҙ ҡыш көндәре һыуығыраҡ булһа ла, түҙерлек. ”Таң”ға яҙылыу буйынса 402 дана план еткерелһә, әле 280-енә яҙҙыртҡанбыҙ. Район гәзитен ҡыйбат, тиҙәр, әммә яҙылалар. Мәктәп етәкселеге, уҡытыусылар коллективы подписка осоронда ҙур әүҙемлек күрһәтә. Килем буйынса пландар үтәлә, подписка буйынса ла һынатмабыҙ.
А. Хәйбуллина, Аҫҡар почта бүлексәһе етәксеһе:
- Район гәзитенә яҙҙырыу буйынса планды әле 79 процентҡа үтәнек, республика буйынса – 41 процентҡа. “Таң”ға яҙылыу бик ауыр бара – унда йүнле мәғлүмәт юҡ, тиеүселәр бар. Почтальондар өй беренсә йөрөй.
Компьютерға яңы программа ҡуйҙылар ҙа, эштә аҙыраҡ кәмселектәр булып алды. “Форсаж” программаһы эшләмәү сәбәпле, ата-әсәләр ҡырҙа уҡыған балаларына аҡса ебәрә алманы. Халыҡ башҡортса гәзиттәр, дини календарҙар һорай.
Бинабыҙ бик һыуыҡ. Ауыл хакимиәтенекеләр икенсе бинаға күсһә, туңмай ҡыш сығыуыбыҙ икеле.


Нәркәс Баймырҙина,Иҫке Собханғол почта бүлексәһе етәксеһе:
- Беҙҙең ҡарамаҡта 6 ауыл, ошо ауылдар халҡын 10 почтальон хеҙмәтләндерә. Әлеге ваҡыттағы төп бурысыбыҙ – киләһе ярты йыллыҡҡа гәзит-журналдарға яҙылыуҙы сифатлы итеп ойоштороу. Еткерелгән планды 50 процентҡа үтәнек – был насар түгел, минеңсә. Белорет почтампты беҙгә 510 дана “Таң” ға яҙылырға ҡушһа, район – 960 данаға. Был күрһәткескә етергә ине лә бит – нисек килеп сығыр.
Халыҡ гәзитте берәмләп һатып алырға теләй. Беҙ айҙың 22-һенә тиклем пенсия таратҡанда һатабыҙ, ҡалған бер аҙнаһында һатып булмай. Барлығы 50 ”Таң” ваҡлап һатыла, редакцияның үҙенән дә барып һатып алырға мөмкин.
Эшләргә бөтә шарттар бар. Тик шуныһы: Баҙал биҫтәһендәге, Иҫке Мөсәттәге яңы барлыҡҡа килгән урамдарҙағы йорттарҙың номеры юҡ, шуға почтальондарға эш ауырлаша. Тағы бинабыҙ ҙур ғына, ә йыйыштырыусы юҡ. Ҡыш көнө ҡар көрәү ҙә мәсьәлә буласаҡ.

Х. Нәҙершина, цех начальнигы:
- Бөгөн эштә алғыр булам, тиһәң, өлгөр булыр кәрәк. Һәр нәмәне талап-ҡағиҙә ҡушҡанса үтәү шарт. Элекке заман бөттө, бөгөн яңыса эшләргә кәрәк. Бөгөн бүлексәләр араһында тик Иҫке Собханғолдар ғына рентабелле эшләй. Аҫҡар, Яңы Монасип, Һарғая бүлексәләренә тырышырға ғына ҡала.

А. Әлибаков, район хакимиәте башлығы урынбаҫары:
- Почта хеҙмәте элекке кеүек гәзит-журнал таратыу, посылка, бандероль, телеграмма ебәреү менән генә шөғөлләнмәй хәҙер. Х. Нәҙершинаның былтырғы отчетына күҙ һалһаҡ, улар халыҡҡа 93 төрлө хеҙмәт күрһәтә. Бөгөн һеҙҙең төп бурыс – подписканы, бигерәк тә “Таң” гәзитенә яҙылыуҙы, яҡшы ойоштороу. Билдәле, берәүҙәргә программа бите оҡшамай, икенселәр ҡотлау-реклама күп, ти. Бөгөн бөтә кешенең зауҡына тап килгән гәзит сығарып булмай, билдәле. Әммә бөтә көстәрҙе туплап “Таң”ға яҙылыуҙы ойошторор кәрәк, сөнки ул – районда сыҡҡан берҙән-бер мәғлүмәт сығанағы, властар менән – халыҡты, халыҡты власть менән бәйләп тороусы сара, райондың йылъяҙмаһы, уның тын алышын, йәшәйешен сағылдырыусы баҫма, рухты, телде һаҡлар ҡалҡан. Урал аръяғы гәзиттәрен ҡараштырып барам – беҙҙең гәзиткә еткән гәзит юҡ! Бөгөн йоҡлап ята торған заман түгел. Эшләргә һәм эшләргә кәрәк!
Эйе, гәзит-журналдарға, бигерәк тә “Таң”ға яҙылыу торошо бөгөн маҡтанырлыҡ түгел. Районыбыҙ киләсәктә лә “Таң”лы булырмы, ошо баҫма көндәребеҙгә артабан да ҡеүәт биреп торормо-юҡмы – быныһы инде һинән тора, райондаш!

Яҙылмайса хатта
бер баҫмаға,
Мөмкинме һуң
тел тип янырға?
Башҡортлоҡтан
ситтә йөрөгәндең
Нисек башҡортлоғон
танырға?
Шулай яҙып сыҡты үҙенең “Башҡортлоҡ” шиғырында талантлы шағирә Лариса Абдуллина.
Мәҡәлә башындағы мәҡәлгә ҡайтып, кәңәшмәлә әйтелгән алтын кәңәштәр, һүҙҙәребеҙ йөрәк-сәптәргә тейеп, башығыҙҙы гәзиткә яҙылыу яғына борһа ине, тигән теләктә ҡалабыҙ.

А. Ғарифуллина.