Тәүге ҡыңғырау сыңланы

Сара уҡыу алдынғылары 9-сы кластан Ильяс Мырҙағоловтың һәм 4-се кластан Әдилә Ғабдулхаеваның Рәсәй Федерацияһының һәм Башҡортостан Республикаһының Дәүләт флагтарын күтәреүе, Гимндар яңғырауы менән башланды. Быйыл мәктәбебеҙҙә 44 уҡыусы белем аласаҡ. Шуларҙың 5-әүһе 1-се класҡа тәү аяҡ баҫыусы биш малай.

Бына улар: Васильев Артем Алексей улы, игеҙәктәр Рәнис һәм Рәсил Рәмил улдары, Тимур Мәүлит улы, Рәдиф Заһир улы Ҡарасуриндар. Уларға башланғыс кластар уҡытыусыһы, Рәсәй Федерацияһының маҡтаулы мәғариф хеҙмәткәре Хәлиҙә Мазһар ҡыҙы Назарова белем һәм тәрбиә бирәсәк.

Уҡыусыларҙы, уҡытыусыларҙы, атай-әсәйҙәрҙе иҫтәлекле көн менән ҡотларға район хакимиәте башлығы исеменән вәкил Юлмөхәмәтов Булат, мәктәптең элекке директоры, мәғариф ветераны, Рәсәй Федерацияһы хәрби ғәскәрҙәре знагы эйәһе, район түңгәүерҙәре ҡоро рәйесе Мәүлит Мөхәмәтйәнов, мәктәптең ветерандар Советы рәйесе, уҡытыусы - ветеран, Рәсәй Федерацияһының маҡтаулы мәғариф хеҙмәткәре Айһылыу Мәсәғүтова, ауыл китапханасыһы, республикала "Милләт әсәһе" исеменә эйә Разия  Кинйәкәева, ата-әсәләр комитеты рәйесе Сөмбөл  Мостафина, ауылдың ҡатын - ҡыҙҙар Советы рәйесе Альбина  Хәйбуллина, шәхси эшҡыуар, район Советына депутатлыҡҡа кандидат Фирғәт Хәйбуллин уҡыусыларға изге теләктәрен еткерҙеләр.

Булат Шамил улы, Айһылыу Сабирйән ҡыҙы, Фирғәт Мөхәмәт улы беренселәргә төбәп алып килгән иҫтәлекле бүләктәрен тапшырҙылар. Мәүлит Ырыҫйән улы беренселәргә уҡыу йылы барышында үҙенең шәхсән әҙерләгән бүләк-сюрпризын тапшырасағын әйтеп ҡыуандырҙы. Ә инде мәғариф алдынғыһы Айһылыу Мәсәғүтова башланғыстар һәм өлкән класс уҡыусылары өсөн айырым бер мең күләмендәге шәхсән стипендияһын булдырҙы. Был премияға лайыҡ булыу өсөн уҡыусылар тырышасаҡ.

Тантанала мәктәп етәксеһе Зилә Зәкирова сығыш яһап, барыһын да Белем көнө менән ҡотланы, уҡыусыларҙың уңыштарын барланы, мәктәптең быйылғы йылда мәктәптәр әҙерлеге буйынса районыбыҙҙың иң яҡшы мәктәптәре исемлегенә инеү шатлығы менән уртаҡлашты, артабан да һынатмаясағыбыҙҙы белдереп, юғары үрҙәр теләне һәм беренселәргә мәктәп кәрәк-ярағы менән тулы портфель бүләк итте. Уҡытысыларға уҡыусылар сәскәләр тапшырҙы.

Тантаналы линейкала беренселәр Белем байрамын шиғырҙар, йырҙар менән байытты. Беренселәргә белем асҡысын, изге теләктәрен әйтеп, уҡыу алдынғыһы, сығарылыш уҡыусыһы Элина Хәйбуллина тапшырҙы. Туғыҙынсыларҙың сығыштары бик үҙенсәлекле яңғыраны, тап улар беренсе класс уҡыусыларына тәүге Әлифба китабын бүләк иттеләр.

Беренселәрҙең ата-әсәләре исеменән ике игеҙәк улдарын уҡырға алып килеүсе Кристина Алексей ҡыҙы һәм Рәмил Мәжит улы Ҡарасуриндар, беренсегә уҡырға килеүсе Артем Васильевтың атаһы Алексей Николай улы һәм олатаһы Николай Василий улы Васильевтар ҡотлау теләктәрен еткерҙе. Васильевтар Өфө ҡалаһынан улдары Артемды ҡотларға килеп еткәндәр.

Тәүге ҡыңғырауҙы ағалы-ҡустылы, аталары бөгөнгө көндә махсус хәрби операцияла булған яугирыбыҙ Заһир Мәжит улы Ҡарасуриндың улдары 1-се класҡа уҡырға килгән Рәдиф менән 9-сы класс уҡыусыһы Хансура яңғыратты. Әйткәндәй, Бөрйән районы хакимиәте вәкиле Булат Юлмөхәмәтов Рәдифте Белем көнөнә өйөнән барып алып, мәктәпкә үҙ оҙатыуында алып килде. Был мәл беренсе класс уҡыусыһы Рәдиф өсөн бик иҫтә ҡалырлыҡ булды. Артабан ата - әсәләр менән берлектәге класс сәғәттәре, йыйылыштар үтте, иҫтәлеккә фотоларға төштөләр, ҡунаҡтар, ата - әсәләр мәктәп, ашхана, китапхана менән таныштылар.

Тантананы сағыу итеп мәктәптең уҡытыу - тәрбиә эштәре буйынса етәксе урынбаҫары Сәйҙә Сәйәхова һәм 9-сы класс етәксеһе Зифа Ғәбделхаевалар алып барҙы.

Яуымбай мәктәбендә Белем көнө бик матур үтте. Шуны ла билдәләп үтеү кәрәк: ауыл мәҙәниәт йорто етәксеһе Зөлфирә Вара ҡыҙы Мырҙағолова сараға йәм-йән өрөп, аппаратура һәм музыкаль яҡтан ярҙам итте. Берҙәмлектә көс шул.
Был көн уҡыусылар күңелендә мәңге онотолмаҫлыҡ тәьҫораттар ҡалдырҙы.

Сәйҙә Сәйәхова.