Мәктәп урамына асфальт түшәлде

-Иҫке Монасип урта мәктәбе бөгөнгө көндә белем усағы менән бер рәттән уҡыусыларҙы, ата-әсәләрҙе, ауыл халҡын үҙенә йәлеп итеп торған рухи-мәҙәни үҙәккә лә әүерелә бара. Монасипҡа килгән һәр ҡунаҡты тиерлек тап ошонда экскурсияға алып киләләр, сөнки ул – ауылдың иң матур, зауыҡлы һәм иҫтәлекле урындарының береһе. Белем йортоноң эске мөхите генә түгел, ә ихатаһы ла эстетик яҡтан уйлап эшләнелгән. Уҡыусыларҙың белемен үҫтереү, рухиәтен тәрбиәләүҙе һәм шул уҡ ваҡытта улар өсөн заманға ярашлы уңайлылыҡтар булдырыуҙы алдан күҙаллай белеп, ошо маҡсатта эҙмә-эҙлекле эш алып бара белгән йүнсел етәксенең оҫта ойоштора белеү һәләте хаҡында һөйләй былар.
Мәктәп директоры Данил Камил улы Ҡотлобаев эш башлағандан алып, мәктәп яңырыу һәм камиллашыу кисереүен дауам итә. Күптән түгел капиталь ремонт башҡарылып, балҡып ултырған белем йортона илткән юлды ла электр бағаналары ҡуйҙырып, урамды яҡтыртыуға өлгәшә. Бының менән генә ул туҡталып ҡалмай. Уҡыусылар көн дә йөрөгән ошо урамға асфальт түшәтеүҙе хәстәрләй башлай һәм ошо ниәт менән район хакимиәте башлығы Ғәзиз Миңлеәхмәт улы Манаповҡа мәрәжәғәт итә. Был инициатива хуплана. Уҙған йыл ике ауыл араһын тоташтырып торған яңы күперҙе асырға килгән Башҡортостан Республикаһының юл хужалығы һәм транспорт министры менән был турала эшлекле һөйләшеү алып барыла. Быйылғы йылда ошо юлды төҙөкләндереүгә аҡса бүленде һәм тейешле процедуралар башҡарылғандан һуң, аукционда еңеп сыҡҡан Силәбе ҡалаһының юл төҙөү ойошмаһы августың тәүге көндәрендә эш башлап, урамға “һә” тигәнсе асфальт түшәп, еңел машиналар ҡуйыу урыны ла эшләп ҡуйҙы. Быйыл, Аллаһ бирһә, уҡыусылар мәктәпкә матур һәм тигеҙ урамдан уҡырға барасаҡ.
Ысын ир-егеттәр күп һөйләмәй, ә эше менән иҫбат итәләр. Үрҙә яҙылған ир-уҙамандар тап ана шундайҙарҙан. Ауыл халҡы исеменән уларға ҙур рәхмәтебеҙҙе еткерәбеҙ, - тип хәбәр итә мәктәптең тарих һәм йәмғиәтте өйрәнеү уҡытыусыһы Буранова Зөлфиә Таһир ҡыҙы.