Балаларҙың йәйге ялы хәүефһеҙ үтһен!

Башҡортостан Республикаһының Бала хоҡуҡтары буйынса вәкиле Ольга Панчихина 1 июндән 31 авгусҡа тиклем “Хәүефһеҙ балалсаҡ” Бөтә Рәсәй акцияһы иғлан ителеүе тураһында хәбәр итте.

• Йәйге осорҙа һәр баланың ялы файҙалы һәм хәүефһеҙ ойошторолорға тейеш. Мәҫәлән, үҫмерҙәр клубына, китапханаларға йөрөтөргә, үҫмерҙәрҙе эшкә урынлаштырырға мөмкин. Тағы ла иң мөһиме – балаларҙы үҙҙәрен һаҡларға, хәүефһеҙлек ҡағиҙәләренә өйрәтергә кәрәк. Хәүеф янаған осраҡта ниндәй телефон һандарына шылтыратырға, ғәҙәттән тыш хәлдәр ваҡытында үҙеңде нисек тоторға, таныш булмаған кешеләр менән нисек аралашырға икәнен ата-әсәләр һәм класс етәкселәре аңлатырға тейеш. Ата-әсәләргә балалар менән йөрөгәндә, мәҫәлән, тәбиғәткә сыҡҡанда аптечка алып йөрөү ғәҙәтен индерергә кәрәк. Балалар – беҙҙең киләсәк һәм иң кәрәкле кешеләребеҙ. Әйҙәгеҙ уларҙы һаҡлау, яҡлау өсөн бергәләп тырышайыҡ. Йәйге каникулдар, улар өсөн дә, беҙҙең өсөн дә тыныс, файҙалы һәм иң мөһиме хәүефһеҙ үтһен, - тип белдерҙе Ольга Юрьевна.