Татар тыуһа – тантана, башҡорт тыуһа – биҙа...

Ни өсөн төпкөл башҡорт ауылында яңы тыуған һәр татар өсөн ҡыуаналар?

Был турала телгә лә алғаныбыҙ бар инде. Тик яңыраҡ үҙем шәхсән ишеткәс, бигерәк ҡыҙыҡ тойолдо...

Ике күрше һөйләшә.

Кисә әллә һыйырығыҙ быҙауланы инде?

Эйе. Тик быныһы ла башҡорт булған әле ул.

Беҙҙеке икеһе лә татар.

Минең асҡан ауыҙҙы яба алмайыраҡ торғанды абайлап, күршеләр көлөп ебәрҙе.

Баҡтиһәң, был ауылда ла, райондың күп ауылдарындағы һымаҡ, орғасы быҙауҙы - башҡорт, үгеҙ быҙауҙы татар, тип әйтәләр, имеш. Ә сере ябай ғына - Татарстандан килеп быҙау йыйып йөрөүселәр үгеҙ быҙауҙарҙы ғына алалар икән. Шуға “башҡорт” тыуһа бошоналар, “татар” тыуһа – тантана итәләр. Сөнки “татар”ҙы тейәтеп ебәрәһең дә ҡотолаһың, исмаһам, ә “башҡорт”то һатам, тиһәң, район үҙәгендәге мал һуйыу урынына, әллә күпме яғыулыҡ ҡойоп, машинаға тейәп алып барырға, унда һуйған өсөн түләргә кәрәк. Итең үтмәһә, кире лә тейәп ҡайтырға тура килеп ҡуя.

Шулай итеп, төпкөл башҡорт ауылында йәшәүсе халыҡ яңы тыуған һәр “татар” өсөн ҡыуанып йәшәй. Үәт! Килде бит заманалар... Быҙауҙарҙың да милләте була икән ул.