-18 °С
Болотло
Бөтә яңылыҡтар
Байрамдар, юбилейҙар
23 Ғинуар 2025, 14:30
Зәки Ғилман улына – 90 йәш!
Ошо көндәрҙә районыбыҙҙың билдәле шәхесе, абруйлы аҡһаҡал – Иҫке Собханғолда йәшәүсе Сәғитов Зәки Ғилман улының 90 йәшлек юбилейы. Юбилярҙы Бөрйән районы хакимиәтенән эштәр менән идара итеүсе Ғайса Хәлитов һәм район хакимиәте башлығының эшҡыуарлыҡ һәм инвестициялар буйынса урынбаҫары Илфат Ғәлин өйөнә барып ҡотланы. Рәсми ҡунаҡтар аҡһаҡалға районға оҙаҡ йылдар намыҫлы хеҙмәт иткәне өсөн рәхмәт белдерҙеләр, ныҡлы сәләмәтлек, ғаилә именлеге теләнеләр.
Зәки Ғилман улы – 90 йәш!
Зәки Ғилман улы үҙенең педагогик хеҙмәт юлын 1952 йылда Аҫҡар һигеҙ йыллыҡ мәктәбендә уҡытыусы булып башлай. Төрлө йылдарҙа Иҫке Собханғол урта, Ағиҙел һигеҙ йыллыҡ мәктәптәрендә уҡытыусы, завуч, директор булып эшләй.
КПСС-тың Бөрйән район комитетында секретарь вазифаһын башҡара, “Ағиҙел”ял һәм һауыҡтырыу лагерында начальник, район ветерандар Советы рәйесе, “Бөтә Рәсәй инвалидтар йәмғиәте” йәмәғәт ойошмаһы рәйесе ла була.
Уның намыҫлы хеҙмәте оҙаҡ йылдар дауамында төрлө наградалар менән баһаланған. Ул “СССР-ҙың мәғариф алдынғыһы” билдәһенә лайыҡ булған. Хеҙмәт ветераны. Фиҙакәр хеҙмәте өсөн башҡа наградалары ла бихисап.
Ҡатыны Ғәлимә Ноғман ҡыҙы менән 3 бала тәрбиәләп үҫтергәндәр.
Зәки Ғилман улын оло юбилейы менән ҡотлайбыҙ, ныҡлы сәләмәтлек, күңел бөтөнлөгө, һәр ваҡыт яҡындарының ихтирамын, һөйөүен һәм хәстәрен тойоп йәшәүен теләйбеҙ!
Зәки Ғилман улы – 90 йәш!
Новости партнеров