ҠОРБАН ҒӘЙЕТЕ МӨБӘРӘК БУЛҺЫН!

- Рәсүл хәҙрәт, Ҡорбан ғәйете хаҡында ни әйтерһегеҙ?
- Ислам динендә шәриғәт тәртиптәре менән үткәрелгән ике байрам – Ураҙа һәм Ҡорбан ғәйеттәре бар. Башҡа байрамдарҙы – ул һабантуй булһынмы, башҡамы – кеше уйлап сығарған. Уларҙы үткәрмәҫкә тигән тыйыу юҡ. Әммә Аллаһ тапҡырында үҙ хөкөмө, тәртибе булған ике генә байрам бар – әле телгә алынған ике ғәйет байрамы.
Ҡорбан ғәйетен үткәреүҙең сәбәбе - улар пәйғәмбәрҙәрҙең тарихына барып тоташа. Ғәйет алдынан булған көндәр менән, йәғни зөлхизә айының 10 көнө менән Аллаһ ант итә( “Фәджр” (“Таң”) сүрәһенең 2-се аяты). Аллаһ бер нәмә менән ант итә икән – Ул бының бөйөклөгөн аңлата. Ғалимдар ошо 10 көндө зөлхизә айының 10 көнө, ти. Был көндәр бөйөк, Аллаһы Тәғәлә алдында ҡәҙерле, сауаплы. Зөлхизәнең тәүге 9 көнөндә хаждың бөтә ғәмәлдәре үтәлә. 9-сы зөлхизә, дүшәмбе, 20 август – Ғәрәфә көнө. Был көндә Ер шарының төрлө илдәренән ислам диненең 5-се терәге булған хаж ғибәҙәтен үтәү ниәте менән килгән хажиҙар Ғәрәфәт тауында тора, тәүбә-истиғфар ҡыла, тәлбиәләр әйтә. Хажға бара алмағандар был көндә ураҙа тотһа, бик сауаплы. Пәйғәмбәребеҙ, с.ғ.с., Ғәрәфә көндө ураҙа тотҡан кешенең әүәлге гонаһтары юйыла, тигән.
9-13-сө зөлхизә – тәшриҡ көндәре. Тәшриҡ – ғәрәптәрҙә итте киптереү процедураһы. Ғәрәфә көнөнөң иртәнге фарыз намаҙынан башлап13-сө зөлхизәнең икенде намаҙынаса һәр фарыз намаҙҙан һуң “Аллаһу әкбәр. Аллаһу әкбәр. Лә иләһә илләл-лаһү үәл-лаһү әкбәр. Аллаһу әкбәр. Үә лилләһил–хәмд”- тип тәкбир әйтер кәрәк (1-ҙе, 3-тө, 5-те әйтһәң дә була, бер тапҡыр әйтһәң, ваджиб үтәлгән була).
Зөлхизәнең 10-сы көнө, беҙҙеңсә 21 августа, бөтөн хажиҙар Ғәрәфә тауынан төшөп, ҡорбан сала. Хажға бармағандарға (ир-атҡа, ҡатын-ҡыҙға) мәсеттә йә етәксе рөхсәт иткән ерҙә имамға эйәреп 2 рәҡәғәт ғәйет намаҙы уҡыу ваджиб. Әгәр имамға эйәреп уҡырға өлгөрмәһә, имам менән бергә тороп уҡымаһа, был намаҙ ҡаза ҡылынмай. Ғәйет намаҙҙары – ҡайтарып булмай торған ғибәҙәттәр.