Тиҙҙән Яңы йыл!

Муниципаль район хакимиәте башлығы Яңы 2018 йылды байрам итеү саралары тураһындағы ҡарарға ҡул ҡуйҙы. Байрамды әҙерләү һәм үткәреү буйынса ойоштороу комитеты төҙөлдө, саралар планы раҫланды.
Ойоштороу комитетына ауыл биләмәләре башлыҡтары, профсоюз ойошмалары һәм башҡа йәмәғәт ойошмалары менән бергә мәғариф һәм мәҙәниәт учреждениеларында, ауылдарҙағы майҙандарҙа Яңы йылға бағышланған карнавалдар, театрлаштырылған тамашалар һәм башҡа саралар ойошторорға тәҡдим ителә.
Шыршыларҙы биҙәгәндә целлулоид һәм башҡа тиҙ янып китеүсән уйынсыҡтар һәм биҙәү әйберҙәре, шыршыға иллюминация өсөн майшәмдәр, бенгаль уттары ҡулланыу, шулай уҡ шыршы төбөнә уттан һаҡлаусы состав менән эшкәртелмәгән мамыҡ һалыу, шыршы ботаҡтарына шундай мамыҡтан эшләнгән уйынсыҡтар элеү тыйыла.
Байрам уңайынан “Һаумы, Яңы йыл!” тигән район конкурсы иғлан ителә һәм “Яңы йыл әйлән-бәйләне” тигән байрам ойошторола. Бынан тыш, “Яңы йылдың әкиәт ҡаласығы” конкурсы ла үткәрелә.
23 декабрҙә яңы йыл алды ауыл хужалығы йәрминкәһе күҙаллана.
Район ауылдарында үтәсәк бал-маскарадтарҙың көндәре лә раҫланды. Әтектә, Ырғыҙлыла, Һарғаяла шыршы байрамдары 31 декабрҙә, ә ҡалған ауылдарҙа 30 декабрҙә үтә.
20 декабрҙән 30 декабргә тиклем ойошма-учреждениеларҙың һорауы буйынса Ҡыш бабай менән Ҡарһылыу балалар өсөн яңы йыл иртәлектәре үткәрә.