Ҡаҙ өмәләре – тырышлыҡ-муллыҡ күрһәткесе ул!

-Ҡаҙ өмәһе – халҡыбыҙҙың көҙгө муллыҡ һәм байлыҡ байрамдарының береһе. Ҡаҙ өмәһе – ҡошто салып таҙартыу ғына түгел, матур итеп аралашыу, күңел асыу, тәжрибә уртаҡлашыу, үҙеңде күрһәтеү өсөн мөмкинлек тә ул.

Быйыл был йоланы күрһәтеү уңған, тырыш, татыу ғаиләләрҙең береһенә - Мәүлиха апайға, килене Римма менән улы Винер Көмөшбаевтарҙың өлөшөнә төштө. Уңған ғаилә күпләп мал-тыуар тота, йыл да ҡош-ҡорт алып ҡарай, баҡса тултырып йәшелсә-емеш үҫтерә.
Был көндә милли кейемдәге ҡатын-ҡыҙҙар, ағинәйҙәр өмә үтәсәк йортҡа иртүк йыйылды. Хужа ҡаҙҙарҙы салды.
Теҙелеп ултырып, гармунға ҡушылып йырҙар йырлай-йырлай, ҡаҙ мамығын йолҡоу күңелле байрамға әүерелде. Эстәрен алып таҙартҡас, түшкәләрҙе көйәнтәләргә элеп, Һарағы йылғаһына төшөп сайҡатҡанда ла үҙ-ара шаяра-көлә аралашыу, изге теләктәр әйтешеү, йыр-моң тынманы.

Ә кис өмәселәрҙе хужабикә бешергән ҡаҙ һурпаһы, ит, тәмле сәй табыны көтә ине. Киләһе йылда ла ҡош-ҡорттарының уңыуын, үҙҙәренә һаулыҡ, донъяға именлек теләп, рәхмәттәр әйтеп таралышты өмәселәр был ҡунаҡсыл йорттан, - тип хәбәр итәләр Килдеғол ауыл китапханаһы төркөмөндә.

Сығанаҡ:

Кильдигуловская сельская библиотека