Һөнәренән йәм таба

Яңғыҙ, әлбиттә, бер ниндәй ҙә уңышҡа өлгәшеп булмай. Был йәһәттән Айгөл Ривал ҡыҙына бошонаһы түгел - бергә эшләгән коллегалары менән татыу, берҙәм эшләйҙәр.

-Хеҙмәт осоромда бер ҙә һүҙгә килешеп, мөнәсәбәттәр боҙоп йөрөмәнек. Бер кемде лә айырып әйтә алмайым, барыһы ла үҙ эшен белеп, теүәл башҡара, - ти Айгөл Ривал ҡыҙы.

Хеҙмәттәштәре лә уның ярҙамсыл, талапсан, алсаҡ, ихлас күңелле, үҙ эшенең оҫтаһы булыуын оҡшаталар.

Аштың тәме хужанан, ти икән халыҡ – бында ла дөрөҫлөк бар - Айгөл Ривал ҡыҙы эшен йөрәге менән яратып, күңелен һалып башҡара, үҙ һөнәренән тәм таба.

Тормош иптәше Фаил ағай менан татыу донъя көтәләр. Хужабикәнең ҡулынан килмәгән эше юҡ. Баҡса тултырып йәшелсә-емеш үҫтереүсе, донъяһын гөл итеп тотоусы Айгөл апай ғаиләһен тәмле аш-һыуҙар менән һыйларға ярата. Айырыуса өйҙәгеләр уның мантыһын, картуф билмәнен, ҡамыр аҙыҡтарын яратып ашай.

Фаил ағай күптән түгел Себер яҡтарында эшләй башлаған. Оло ҡыҙҙары Наҙгөл медицина колледжының 4-се курсында белем ала. Динә 9 кластан һуң металлургия колледжына уҡырға ингән.

Ашнаҡсылар тәмле бешереүҙән тыш, банкеттар ойошторғанда, байрамдарҙа ижади яҡтан да үҫәләр - өҫтәлдәрҙе сервировкалау, халыҡҡа оҡшарлыҡ тәмле аш-һыу әҙерләү, дөрөҫ итеп өҫтәлгә тәҡдим итеү оҫталыҡтарын арттыралар.

-Алсаҡ, аралашыусан кешеләр оҡшай. Улар менән бер һөйләшеп алһаң да, бөтә борсолоуҙарың, арыуҙарың юҡҡа сыҡҡандай тойола. Ҡатын-ҡыҙҙың уңышы - тырышлыҡтан, егәрле, уңған булыуҙан, - тип һанай Айгөл Ривал ҡыҙы.

Әтек ауылында ғүмер итеүсе ата-әсәһе Ривал Шәмсетдин улына, Рәзифә Насип ҡыҙына оло рәхмәтле ул.

-Тормошта үҙ урынымды табыуымда ата-әсәйемдең роле баһалап бөткөһөҙ. Йәнә хеҙмәт юлымды башлаған йылдарҙа миңә дөрөҫ йүнәлеш биреүсе, кәңәштәре менән ярҙам итеүсе апайҙарға рәхмәтлемен, - ти өлкән ашнаҡсы.

Күңел һалып башҡарған эшеңдең һөҙөмтәһе лә ғорурланырлыҡ була. Тырышлығыңды күрә белеүҙәре үҙе бер ҡыуаныс: күптән түгел генә Айгөл Ривал ҡыҙына Рәсәй ҡулланыусылар кооперацияһының 190 йыллығына ҡарата сығарылған юбилей миҙалы тапшырылған.

-Кешене намыҫлы хеҙмәте биҙәй. Хеҙмәт яратҡан, эш һөйгәндәр тормошта юғалып ҡалмай. Ҡыҙҙарыма ла теләге шул: һөнәр һайлағанһығыҙ икән, тырышып эшләгеҙ. Хәҙерге заманда тик тырыштар ғына уңышҡа өлгәшә ала, - тигән матур теләктәрен дә әйтте Айгөл Ривал ҡыҙы.