Ике уңған пар килгән

Мәктәптә ашнаҡсы булып эшләгән Зөлхизәне юллап барып, үҙен күреп һөйләшеп тә өлгөрмәнек – йәше-ҡарты уларға ыңғай яҡтан  ҡылыҡһырлама биреп,  маҡтап-күтәреп ташланы.

Ике уңған пар килгән шул – Ҡарағоловтарҙың матур ғаиләһендә, береһенән -береһе уҙышып, өс ир-егет үҫә – Шайморат, Иҙел, Илназ. Зөлхизә донъяһын ялтыратып көтһә, йәй башынан баҡсаһын сәскә-гөлгә күмһә, Фәнгиз ир-ат эшен ыратырға, бөтә уңайлыҡтар булдырып,  хәләленең тормошон  еңеләйтергә генә тора.

- Ирем йыш ҡына урманда, башҡа эштәрҙә йөрөй.  Әле Науразбаев Зәйнулла  олатай нигеҙенә  өй һалып  йөрөйбөҙ. Иремдән уңдым – эсмәй, донъя көтөргә тырышып ята, - ти 18 йәшендә генә килен булып төшкән Зөлхизә.

Йәштәр кешенән ҡалмай йәшәргә тырыша – күп итеп мал аҫрай, ҡош-ҡорт көтә.

“Уландарыбыҙҙы итәғәтле, тәртипле, кешелекле, тырыш итеп тәрбиәләргә тырышабыҙ. Малайҙар ҡара эшкә лә, бар нәмәгә лә маһир булһын ул”, - ти йәш әсә.

Эйе, һүҙҙәрендә хаҡлыҡ бар уның – киләсәккә нигеҙ, бөтә нәмәгә баш нәҡ ғаиләлә һалына.