Илем тиеп ирҙәр йәшәйҙәр

Илем тиеп ирҙәр йәшәйҙәр
Бөрйән шуравиҙарына
Афғанстан. Ҡайнар ҡояш иле.
Ҡояш ҡыҙыу һуғыш утылай.
Көйҙөрөп тә үҙ тамғаңды баҫтың
Яҙмыштарға, ярып урталай.
Бер яртыһы – алыҫ Тыуған илдә,
Таңдар тыныс атҡан төбәктә.
Бер яртыһы һиндә, Афғанстан,
Ғүмер сиге – утлы көбәктә.
Тауҙарыңда күпме эҙҙәр ҡалды,
Беҙҙең йәшлегебеҙ эҙҙәре.
Бында һуғыш, үлем һәм ҡотолоу,
Аҫта – ҡышлаҡ, афған өйҙәре.
Артылыштар, боролоштар ҡалды,
Таш ҡыҙыуы күсте йәндәргә.
Беҙ һынманыҡ, һаман алға барҙыҡ –
Ир-егеттеме һуң йәлләргә?
Быуыны ла нығынмаған, тиеп
Йәлләмәгеҙ беҙҙе, әсәйҙәр.
Афғанстан беҙҙән ир яһаны –
Илем тиеп ирҙәр йәшәйҙәр.
Егетлеккә ҡаты һынау тоттоҡ,
Тоғролоҡто яҙмыш һынаны.
Һынһа һынды бүлешергә телем,
Ир-егеттең рухы һынманы.
Афғанстан... Алыҫ-алыҫ ерҙәр –
Тау-таштарҙан торған ил бары.
Унда ҡояш, дуҫлыҡ хисе ҡайнар,
Ир-егетлек даны юғары!
Айһылыу Ғарифуллина