ДАУАХАНАҒА ЙӘШ БЕЛГЕСТӘР КИЛДЕ

Башҡортостан Республикаһында “Ауыл докторы” проектын бойомға ашырыу дауам итә. Проект айырыуса республиканың алыҫ райондарында йәшәүсе ауыл халҡына медицина ярҙамы күрһәтеүҙең сифатын яҡшыртыуға йүнәлтелгән.

2020 йылда ошо программа сиктәрендә районға 5 йәш белгес эшкә килгән. Участка табип-терапевты Инзиә Салауатова һәм табип-педиатр Нургизә Дәүләтбаева үҙ эштәрен башлаған да инде. Участка табип-педиатры Гөлшат Итҡолова һәм табип-стоматолог Таңатар Ҡасимов халыҡты Байназар амбулаторияһында ҡабул итә.

Башҡорт дәүләт медицина университетын тамамлағандан һуң, йәш белгес - провизор Дилә Ишбаева хеҙмәт юлын шулай уҡ район үҙәк дауаханаһында башлаған.

Район үҙәк дауаханаһы баш табибы Илмир Фәтҡуллин билдәләүенсә, йәш белгестәрҙең килеүе кадрҙар менән тәьмин итеү хәлен күпкә яҡшыртты.

-Әлеге ваҡытта Бөрйән һаулыҡ һаҡлау учреждениеларында 285 кеше эшләй, уларҙың 39-ы табиптар, 146-һы урта медицина персоналы. 2019 йылда “Ауыл докторы” программаһына ярашлы, хирург-травматолог һәм участка табип-терапевты, шулай уҡ 4 фельдшер “Ауыл фельдшеры” программаһы буйынса эш башланылар. Әммә учреждение табиптарға әле лә ҡытлыҡ кисерә. Бөгөнгө көнгә 3 табип талап ителә, атап әйткәндә фтизиатр, дермато-венеролог һәм балалар хирургы, - ти баш табип И. Фәтҡуллин.